ఈ రోజు వరకు యుద్ధాన్ని కోరుకోలేదు.. హేలీ!

సుమారు రెండు నెలలు పాటు క్షిపణి, అణ్వాయుధ ప్రయోగాలు నిర్వహించకుండా గుంబనంగా వ్యవహరించిన ఉత్తర కొరియా బుధవారం అత్యంత శక్తివంతమైన ఖండాతర బాలిస్టిక్ క్షిపణిని విజయవంతంగా పరీక్షించింది. అమెరికా ప్రధాన భూభాగాలే లక్ష్యంగా ఈ ఖండాంతర క్షిపణిని రూపొందించామని ఉత్తర కొరియా స్పష్టం చేసిన విషయం తెలిసిందే. అత్యంత శక్తివంతమైన హసాంగ్-15 రకానికి చెందిన ఈ క్షిపణి 53 నిమిషాల్లోనే 950 కి.మీ. దూరంలోని లక్ష్యాన్ని చేరుకుని, విజయవంతమైందని, అమెరికా భూభాగం తమ గుప్పెట్లోకి వచ్చిందని కిమ్ జోంగ్ ఉన్ ప్రకటించారు.

ఉత్తర కొరియా తాజా క్షిపణి ప్రయోగంపై అమెరికా తీవ్ర ఆగ్రహం వ్యక్తం చేసింది. చైనా సహకారంతోనే ఉత్తర కొరియా ఖండాంతర క్షిపణి ప్రయోగం నిర్వహించిందని ఐక్యరాజ్యసమితిలో అమెరికా శాశ్వత ప్రతినిధి నిక్కీ హేలీ ఆరోపించారు. దీనిని బట్టి ఐరాస ఆంక్షలు విధించినా ఉత్తర కొరియాకు ముడి చమురు సరఫరాను చైనా పూర్తిగా నిలిపివేయలేదని స్పష్టమవుతోందని హేలీ వ్యాఖ్యానించారు. ఆ దేశాధినేత కిమ్ జోంగ్ యుద్ధాన్ని కోరుకుంటున్నట్లు అనిపిస్తోందని, యుద్ధమే వస్తే ఉత్తర కొరియా నామరూపాల్లేకుండా పోతుందని ఆమె హెచ్చరికలు జారీ చేశారు.

ఉత్తర కొరియా వరుస అణ్వాయుధ, క్షిపణి ప్రయోగాలను తీవ్రంగా పరిగణిస్తూ, కిమ్‌ను నిలువరించేందుకు అన్ని ప్రత్యామ్నాయాలను ఆలోచిస్తున్నామని, వాటిలో సైనిక చర్య కూడా ఉందని ఐరాస కౌన్సిల్‌ సమావేశంలో నిక్కీ హేలీ ప్రకటించారు. ఉత్తర కొరియా తన దుందుడుకు వైఖరిని తక్షణమే నిలిపివేయాలని, లేకపోతే పరిస్థితులు మరింత దిగజారే ప్రమాదముందని ఆమె హెచ్చరించారు. "ఈ రోజు వరకూ ఆ దేశంతో మేము యుద్ధాన్ని కోరుకోవడం లేదు.... అదే జరిగితే, మాత్రం ఉత్తర కొరియా సమూలంగా నాశనమవుతుంది" అని ఆమె జోస్యం చెప్పారు. అంతేకాదు ఉత్తర కొరియాకు ఇంధన సరఫరాను చైనా తక్షణం నిలిపివేయాలని నిక్కీ హేలీ డిమాండ్ చేశారు.

అలాగే కొరియా చర్యలపై చైనా అధ్యక్షుడు జిన్‌పింగ్‌తో మాట్లాడిన డొనాల్డ్ ట్రంప్, తక్షణమే ముడి చమురు ఎగుమతిని ఆపాలని కోరినట్లు ఆమె వెల్లడించారు. తమ అధ్యక్షుడు చేసిన విన్నపాన్ని జిన్‌పింగ్ అమలుచేస్తారని భావిస్తున్నామని, దీని వల్ల ఇతర దేశాల ప్రయోజనాలను కాపాడుగలుగుతారని హేలీ పేర్కొన్నారు. డ్రాగన్ తన నాయకత్వాన్ని నిరూపించుకోవాలని, ఇది ఆ దేశం చేతుల్లోనే ఉందని ఆమె అన్నారు. ఉత్తర కొరియాపై తక్షణమే అమెరికా ఎలాంటి చర్యలు తీసుకుంటుందో స్పష్టం చేయమని, కానీ గత దశాబ్దకాలంగా వాణిజ్యపరమైన ఆంక్షలను ఎక్కువచేసిందని హేలీ తెలిపారు.