అక్కడ దొంగలు, వేశ్యలకు బహిరంగ ఉరిశిక్షలు!

ఉత్తర కొరియాలో జరుగుతున్న దారుణాలపై అక్కడ నుంచి తప్పించుకుని వచ్చి దక్షిణ కొరియాలో జీవితాన్ని గడుపుతున్న వారు వెల్లడించారని చెబుతూ విడుదలైన ఓ నివేదిక కలకలం రేపుతోంది. నదీ తీరాలు, స్కూళ్లలోని ఆటస్థలాలు, మార్కెట్లలో ఇలా ఎక్కడ బడితే అక్కడ బహిరంగ ఉరిశిక్షలు సర్వసాధారణమేనని సియోల్ కేంద్రంగా పనిచేసే ట్రాన్సిషనల్ జస్టిస్ వర్కింగ్ గ్రూప్ అనే స్వచ్ఛంద సంస్థ పేర్కొంది. ఈ దారుణాలను విద్యార్థులు కూడా ప్రత్యక్షంగా చూస్తున్నారని వారు తెలిపారు. వేశ్యావృత్తిలో ఉండి పట్టుబడిన వారిని, దొంగలను, దక్షిణ కొరియా వ్యక్తులతో మాట్లాడుతూ, సమాచారాన్ని పంచుకునే వారికి బహిరంగ మరణదండన శిక్షలు విధిస్తున్నారని వారు ఆరోపించారు.

ఇక ఉరితీసే ప్రదేశాలను మ్యాప్‌లో వారు గుర్తించారని చెబుతూ వాటిని ఈ నివేదికలో ప్రచురించారు. ఓ క్రమ పద్ధతిలో మనుషులను హింసించి చంపుతున్నారని కూడా ఈ రిపోర్టు వెల్లడించింది. టీజేడబ్ల్యూజీ రెండేళ్ల కాలంలో ఉత్తర కొరియా నుంచి తప్పించుకు వచ్చిన 375 మందిని ఇంటర్వ్యూ చేసింది. మానవహక్కుల కార్యకర్తలు, పరిశోధకులతో ఏర్పాటు చేసిన ఈ బృందానికి ఉత్తర కొరియాలో మానవహక్కుల రక్షణకు పనిచేసిన న్యాయవాది లీ యూంగ్‌వాన్ నాయకత్వం వహించారు. దశాబ్దాలుగా బహిరంగ ఉరిశిక్షలు నిర్వహించే ప్రదేశాలను నివేదికలోని మ్యాప్‌లో పొందుపరిచారు.

అయితే తమ దేశంలో అసలు మానవహక్కుల ఉల్లంఘన జరగడం లేదని, రాజ్యాంగపరంగా పౌరులు రక్షణ సాగుతుందని ఈ నివేదికను ఉత్తర కొరియా తోసిపుచ్చింది. అంతేకాదు అమెరికాలోనే ఈ ఉల్లంఘనలు ఎక్కువగా ఉన్నాయని ఆరోపించింది. నాజీల పాలనలో సాగిన పెద్ద సంఖ్యలో జైలు శిక్షలు, క్రమపద్ధతిలో హింస, ఆకలి, మరణశిక్షలు లాంటివి ఉత్తర కొరియా నాయకుడు కూడా అనుసరిస్తున్నాడని ఐక్యరాజ్యసమితి నివేదిక తెలిపింది. మూడేళ్ల కిందట కిమ్ జాంగ్ ఉన్ అధ్యక్ష బాధ్యతలు చేపట్టినప్పటి నుంచి మానవ హక్కుల ఉల్లంఘన పెరిగిందని ఐరాస కమిషన్ వెల్లడించిన సంగతి తెలిసిందే. అలాగే అంతర్జాతీయ న్యాయస్థానంలోనూ ఉత్తర కొరియా అధ్యక్షుడికి వ్యతిరేకంగా ఫిర్యాదు చేశారు.