మరో దుర్మార్గపు చర్యకు సిద్ధమవుతోన్న కిమ్

ఉత్తర కొరియా వరుస అణు, ఖండాంతర క్షిపణి ప్రయోగాలతో ఇప్పటికే ప్రపంచ దేశాలు ఆందోళన వ్యక్తంచేస్తోంటే ఆ నియంత మాత్రం మరో క్రూరమైన పథకాన్ని రచించినట్లు వార్తలు వెలువడుతున్నాయి. ఖండాంతర క్షిపణుల ద్వారా రసాయన ఆయుధాలను శత్రుదేశాలపై ప్రయోగించాలని కిమ్ జోంగ్ ఉన్ భావిస్తున్నట్లు జపాన్ పత్రిక అసాహీ ఓ కథనాన్ని ప్రచురించింది. దీనికి అనుగుణంగా 8 వేల కిలోమీటర్ల పరిధిలోని లక్ష్యాలను చేరుకునే క్షిపణులను అభివృద్ధి చేస్తున్నట్లు ఆ కథనంలో పేర్కొంది. ఆంత్రాక్స్ బ్యాక్టీరియాను ఈ క్షిపణుల్లో అమర్చి శత్రు దేశాలపై ప్రయోగించాలని కిమ్ భావిస్తున్నట్టు దక్షిణ కొరియా నిఘా వర్గాలు కూడా ధ్రువీకరించాయని, అమెరికా వద్ద కూడా ఈ సమాచారం ఉందని తెలిపింది.

ఖండాంతర క్షిపణి ప్రయోగించినప్పడు వెలువడే అధిక ఉష్ణానికి ఆంత్రాక్స్ బ్యాక్టీరియా మనుగడ సాగిస్తుందా? అనే అంశాన్ని నిర్ధరించుకునేందుకు ప్రస్తుతం ప్రయోగాలు కొనసాగుతున్నాయని ఆ పత్రిక తెలియజేసింది. సాధారణంగా ఆంత్రాక్స్ వ్యాధి గొర్రెలకు సోకుతుంది. వాటి నుంచి మనుషులకు కూడా గాలి ద్వారా వ్యాపిస్తుంది. ఆంత్రాక్స్‌కు బ్యాక్టీరియం బాసిల్లాస్ ఆంత్రాసిస్ అనే బ్యాక్టిరియా కారణం. ఇది చర్మం, ఊపిరితిత్తులు, పేగులలో చేరుతుంది. ఈ వ్యాధి సోకిన తొలి దశలో రెండు, మూడు రోజుల పాటు ఫ్లూ లక్షణాలు కనిపిస్తాయి. ఆ తర్వాత తీవ్ర జ్వరం, ఛాతి నొప్పి, షాక్‌కు గురవడం, శ్వాస తీసుకోలేక పోవడం లాంటి లక్షణాలు కనిపిస్తాయి. మూడో దశకు చేరుకున్న రెండు, మూడు రోజులకే వ్యాధి సోకిన జీవులు మరణిస్తాయి.

ఆంత్రాక్స్ రసాయన ఆయుధాలను తొలిసారిగా 1916లో ఫిన్లాండ్‌లోని ఇంపీరియల్ రష్యా ఆర్మీపై నోర్డిక్ తిరుగుబాటుదారులు ఉపయోగించారు. జీవరసాయన ఆయుధాల ఉత్పత్తిలో భాగంగా అప్పటి సోవియట్ యూనియన్ 1970 నుంచి అంత్రాక్స్‌ను వినియోగంలోకి తెచ్చింది. ఈ అయుధాల తయారీ కాంప్లెక్స్‌లో ప్రమాదవశాత్తు 1979 ఏప్రిల్ 2 న వాయువులు విడుదల కావడంతో 68 మంది మరణించారు. ఆ తర్వాత 2001లో అమెరికాలోనూ ఆంత్రాక్స్ దాడులు కలకలం రేపాయి.