కిమ్ తాజా వార్నింగ్... ఊహకందని దాడి చేస్తాం!

దక్షిణకొరియా, అమెరికా సంయుక్త సైనిక విన్యాసాల నిర్వహిస్తోన్న వేళ ఉత్తరకొరియా అధ్యక్షుడు కిమ్ జాంగ్ ఉన్ మరోసారి తీవ్రహెచ్చరికలు జారీ చేశారు. కొరియా ద్వీపకల్పంలో దక్షిణకొరియాతో నిరంతరం ఏదో ఒక డ్రిల్‌తో అమెరికా తమను రెచ్చగొడుతూ, ఉన్మాదంగా వ్యవహరిస్తోందని కిమ్ వ్యాఖ్యానించారు. ప్రస్తుత నౌకాదళ విన్యాసాలు ముగిసిన వెంటనే దక్షిణకొరియాతో మరో కీలకమైన డ్రిల్‌ను అమెరికా నిర్వహించనుంది. యుద్ధ సమయాల్లో ప్రజలను ఖాళీ చేయించి, సురక్షిత ప్రాంతాలకు తరలించడమే ఈ డ్రిల్ ముఖ్యోద్దేశం. రెండేళ్లకు ఒకసారి ఈ డ్రిల్‌ను నిర్వహిస్తున్నప్పటికీ ఉద్రిక్తపరిస్థితుల నేపథ్యంలో నిర్వహించడంపై ఉత్తరకొరియా అభ్యంతరం వ్యక్తం చేస్తోంది.

ఈ చర్యలను అమెరికా ఇలాగే కొనసాగిస్తే ఊహించని సమయంలో ఊహకందని దాడి చేస్తామని కిమ్ హెచ్చరించినట్లు ఉత్తరకొరియా అధికార మీడియా పేర్కొంది. ఈ ప్రకటనతో అమెరికా, ఉత్తర కొరియా మధ్య ఉద్రిక్తపరిస్థితులు తారాస్థాయికి చేరాయి. ఇదిలావుండగా గతవారం ఉత్తరకొరియా రాజధాని ప్యాంగ్‌యాంగ్ సమీపానికి క్షిపణులను తరలిస్తున్నట్లు శాటిలైట్ చిత్రాల్లో స్పష్టమైంది. దీంతో ఆందోళనల స్థాయి మరింత పెరిగింది. మరోవైపు ‘మొదటి బాంబు పడేవరకు’ దౌత్యపరమైన చర్చల కోసం ప్రయత్నిస్తామని అమెరికా ఉన్నతాధికారు ప్రకటించిన సంగతి తెలిసిందే.

ఏ క్షణంలోనైనా అణు యుద్ధం ప్రారంభమవుతుందని ఐక్యరాజ్యసమితిలో ఉత్తర కొరియా డిప్యూటీ దౌత్యాధికారి కిమ్ ఇన్ ర్యాంగ్ మూడు రోజుల కిందటే ప్రకటించారు. అగ్రరాజ్యం నుంచి తమకు ముప్పు పొంచి ఉన్న కారణంగా అణు, క్షిపణి పరీక్షలు నిరంతరాయంగా కొనసాగుతూనే ఉంటాయని ఐక్యరాజ్యసమితిలో స్పష్టం చేశారు. అమెరికా నుంచి తమకు ముప్పు తొలిగేంత వరకు ఈ కార్యక్రమాన్ని ఆపే ప్రసక్తే లేదని తేల్చి చెప్పారు.

1970 నుంచి కేవలం తమని మాత్రమే అమెరికా టార్గెట్ చేసుకుందని... ఆత్మ రక్షణ కోసం అణ్వాయుధాలను కలిగి ఉండటం తమ హక్కు అని కిమ్ ఇన్ ర్యాంగ్ తెలిపారు. అణు పరీక్షలు ఏటా తాము నిర్వహించే సైనిక విన్యాసాల్లో ఒక భాగమని, అయితే తమ దేశాధినేతను అంతం చేసేందుకు అమెరికా చేపట్టిన ఆపరేషన్ అన్నింటికన్నా పెద్ద ప్రమాదకరమైందని ఆగ్రహం వ్యక్తం చేశారు.