ఆల్‌ఖైదా నేతగా లాడెన్ కొడుకు...అమెరికాలో కలవరం!

అమెరికాకే వణుకు పుట్టించిన తీవ్రవాది ఒసామా బిన్ లాడెన్ గురించి ప్రత్యేకంగా చెప్పాల్సిన అవసరం లేదు. 2000 సంవత్సరంలో అమెరికా రక్షణ భవంతి పెంటగాన్, వరల్డ్ ట్రేడ్ సెంటర్‌పై వైమానిక దాడికి పాల్పడి భయభ్రాంతులకు గురిచేసిన ఉగ్రవాద సంస్థ అల్‌ఖైదా వ్యవస్థాపకుడు లాడెన్. లాడెన్ మరణం తర్వాత స్తబ్ధుగా ఉన్న అల్‌ఖైదాకు కొత్త వారసుడు వచ్చాడనే విషయాన్ని తాజా నివేదికలు వెల్లడిస్తున్నాయి. అల్‌ఖైదా వ్యవస్థాపకుడు ఒసామా బిన్ లాడెన్ కుమారుడు హమ్జా బిన్ లాడెన్ (28) అల్‌ఖైదా పగ్గాలు చేపట్టాడని నిఘా వర్గాలు స్పష్టం చేస్తున్నాయి.

అంతేకాదు, వివిధ తీవ్రవాద సంస్థలను ఒకే గొడుగు కిందకు తీసుకొచ్చి, అల్‌ఖైదాను తిరుగులేని శక్తిగా తీర్చిదిద్దేందుకు హమ్జా వ్యూహాలు రచించినట్టు విశ్వసనీయ వర్గాలు సమాచారం. ఈ నేపథ్యంలో అమెరికాతోపాటు ఉగ్రవాద ముప్పు ఉన్న దేశాలు కలవరపాటుకు గురవుతున్నాయి. సిరియా, ఇరాక్‌లో బలంగా పాతుకుపోయి నెత్తుటేర్లు పారిస్తున్న ఐఎస్‌ను ప్రస్తుతం అంతం చేయడానికి ప్రపంచ దేశాలు మల్లగుల్లాలు పడుతున్నాయి. దీంతో అల్‌ఖైదా మళ్లీ పుంజుకునేందుకు అడుగులు వేయడం మరింత కలవరపరిచే అంశమే.

అంతే కాదు హమ్జా పిలిస్తే ఆ సంస్థలో చేరేందుకు వేలాది ముస్లి యువత సిద్ధంగా ఉన్నట్లు తెలుస్తోంది. బిన్ లాడెన్ మహమ్మద్ ప్రవక్త వంశానికి చెందినవాడు కావడమే దీనికి ప్రధాన కారణం. లాడెన్ వారసుడు హమ్జానే అని గతంలోనే అల్‌ఖైదా నాయకులు తీర్మానించారు. ఆ సంస్థ కీలక నేత అల్ జవహరి అయితే... హమ్జాను 'గుహ నుంచి వచ్చిన సింహం' అంటూ అభివర్ణించాడు. బిన్ లాడెన్‌కు, మూడో భార్య శైరియా సమర్‌కు జన్మించిన కుమారుడే హమ్జా. లాడెన్ 20 మంది సంతానంలో హమ్జా 15వ వాడు. హమ్జాకు వివాహమై, ఇద్దరు పిల్లలు ఉన్నట్టు సమాచారం. హమ్జా ఎలా ఉంటాడనే విషయం ఎవరికీ తెలియదు. అతని చిన్ననాటి ఫొటో మాత్రమే ఇప్పటి వరకు వెలుగులోకి వచ్చింది.