చైనా గగనతలంలో చక్కర్లు కొట్టిన భారత డ్రోన్!

భారత్‌కు చెందిన డ్రోన్ వాస్తవాధీన రేఖ దాటి చైనా గగన తలంలో చక్కర్లు కొట్టింది. భారత ఏరియల్ వెహికల్ తమ భూభాగంలోకి ప్రవేశించిందని చైనా మిలిటరీ ప్రకటించింది. సిక్కిం సెక్టార్లో ఈ ఘటన జరిగిందని భారత రక్షణ శాఖ కూడా ధృవీకరించింది. ఈ ఘటనను ఖండించిన డ్రాగన్, తీవ్ర అసంతృప్తిని వ్యక్తం చేసింది. కాగా, తమ డ్రోన్ చైనా గగనతలంలోకి ఎందుకు ప్రవేశించిందో భారత రక్షణ మంత్రిత్వ శాఖ వివరణ ఇచ్చింది.

‘శిక్షణలో భాగంగా ఎప్పటిలాగే ఈ డ్రోన్ భారత గగన తలంలో ఎగిరింది. కానీ కింది నుంచి ఆపరేట్ చేసే వాళ్లతో సంబంధాలను కోల్పోయి సరిహద్దులను దాటింది. సాంకేతిక సమస్య కారణంగానే ఇలా జరిగింది. ఈ విషయమై విచారణ జరుపుతున్నాం’ అని రక్షణ వర్గాలు వెల్లడించాయి. వెంటనే ఈ విషయమై చైనా రక్షణ శాఖకు సమాచారం అందించామని తెలిపారు. దీంతో అప్రమత్తమైన చైనా మిలటరీ డ్రోన్ ఎక్కడ ఉందో గుర్తించిందని రక్షణ శాఖ వెల్లడించింది.

కాగా, ఆ డ్రోన్ ఇప్పటికీ చైనాలోనే ఉందా, లేదంటే భారత్‌కు అప్పగించారా అనే విషయంలో స్పష్టత లేదు. భారత డ్రోన్ తమ గగన తలంలోకి అక్రమంగా చొచ్చుకొచ్చిందని అంతకు ముందు చైనా ప్రకటించింది. ఈ విషయాన్ని పీఎల్ఏ అధికారులు చైనా అధికార వార్తా సంస్థ జిన్హువాకు తెలిపారు. కానీ భారత బలగాలు సంప్రదించిన సంగతిని మాత్రం మీడియాకు చెప్పలేదు. తమ సార్వభౌమత్వానికి భంగం కలిగించేలా భారత్ వ్యవహరిస్తోందని చైనా మండిపడింది.