వాలెంటైన్స్ డే: పాక్‌లో ప్రేమికులకు ఝలక్!

వాలెంటైన్స్ డే రోజున ప్రేమలో తేలిపోదాం అనుకున్న పాక్ ప్రేమికులకు అక్కడి హైకోర్టు ఝలక్ ఇచ్చింది. తమ సాంప్రదాయాలకు విరుద్ధమైన వాలెంటైన్స్ డేను బ్యాన్ చేయాలని తీర్పునిచ్చింది. అంతేకాదు, సోషల్ మీడియా, ఎలక్ట్రానిక్, ప్రింట్ మీడియాలో సైతం ‘ప్రేమ’ అనే ఆ రెండు అక్షరాలు కనిపిస్తే చర్యలు దారుణంగా ఉంటాయని హెచ్చరించింది. ఈ మేరకు ప్రభుత్వానికి నిర్దేశకాలు జారీ చేసింది.

వాలెంటైన్స్ డే, ముస్లిం సంప్రదాయం కాదని, దాన్ని ప్రమోట్ చేస్తున్న మీడియా, సోషల్ మీడియాల్లో దాన్ని బ్యాన్ చేయాలని కోరుతూ.. అబ్దుల్ వహీద్ అనే వ్యక్తి ఇస్లామాబాద్ హైకోర్టులో పిటీషన్ దాఖలు చేశాడు. దీనిపై విచారణ జరిపిన ధర్మాసనం ఈ క్షణం నుంచే దేశంలో ప్రేమికుల దినోత్సవాన్ని బ్యాన్ చేయాలని ఆదేశించింది. పాక్ సమాచార శాఖ, పాకిస్థాన్ ఎలక్ట్రానిక్ మీడియా రెగ్యులేటరీ అథారిటీ (PEMRA)లు ఈ ఆదేశాలను అమలయ్యేలా చర్యలు తీసుకోవాలని వెల్లడించింది. పాక్‌లో పెద్ద నగరాల్లో మినహా మిగతా ప్రాంతాల్లో ఇప్పటికే వాలెంటైన్స్ డేను బ్యాన్ చేశారు. తాజా ఆదేశాలతో ఇకపై అధికారికంగా నిఘా ఉంటుంది.