ఇమ్రాన్‌ను చంపడమో లేదా మనం చావడమో.. పాక్ హోం మంత్రి సంచలన వ్యాఖ్యలు

పాకిస్థాన్ మాజీ ప్రధాని ఇమ్రాన్ ఖాన్‌పై (Imran Khan) ఆ దేశ అంతర్గత వ్యవహారాల మంత్రి రాణా సనావుల్లా (Rana Sanaullah) సంచలన వ్యాఖ్యలు చేశారు. బహిష్కరణకు గురైన ఇమ్రాన్ ఖాన్.. అధికార పీఎంఎల్-ఎన్‌కు శత్రువు అని పాక్ అంతర్గత మంత్రి (Pakistan Interior Minister) అభివర్ణించారు. ఇమ్రాన్‌ లేదా మనం చావడమనే స్థాయికి దేశ రాజకీయాలను ఆయన తీసుకెళ్లాడని ఆరోపించారు. పాకిస్థాన్ ముస్లిం లీగ్ (ఎన్) (PML-N) సీనియర్ నేత, మాజీ ప్రధాని నవాజ్ షరీఫ్‌కు (Nawaz Sharif) సన్నిహితుడైన రాణా సనావుల్లా చేసిన ఈ వ్యాఖ్యలపై రాజకీయ వర్గాల్లో ముఖ్యంగా ఇమ్రాన్ పార్టీ పాకిస్థాన్ తెహ్రీక్ ఇ ఇన్సాఫ్ (PTI)లో తీవ్ర దుమారం రేపాయి. గతేడాది నవంబర్‌లో పంజాబ్‌లోని వజీరాబాద్‌ ర్యాలీలో ఇమ్రాన్‌ ఖాన్ తుపాకీ దాడి నుంచి త్రుటిలో తప్పించుకున్నారు. ఈ సమయంలో తనపై హత్యాయత్నం వెనుక రాణా సనావుల్లా ఉన్నాడంటూ మాజీ ప్రధాని ఆరోపించారు. తనకు హత్య కుట్రదారుల్లో ప్రధాన మంత్రి షెహబాజ్ షరీఫ్, సీనియర్ ఐఎస్ఐ అధికారి ఉన్నాడని ఇమ్రాన్ ఫిర్యాదులో పేర్కొన్నారు.

‘‘ఇమ్రాన్‌ఖాన్‌ లేదా మనం హత్యకు గురవుతాం.. అతను ఇప్పుడు దేశ రాజకీయాలను పీటీఐ లేదా పీఎంఎల్-ఎన్ రెండింటిలో ఒకటి మాత్రమే మిగిలిపోయే స్థాయికి తీసుకెళ్లాడు.. పీఎంఎల్-ఎన్ ఉనికి ప్రమాదంలో ఉంది.. మేము అతనికి వ్యతిరేకంగా జరిగే పోరాటంలో ఏ స్థాయికైనా వెళ్తాం... ఇమ్రాన్ ఖాన్ రాజకీయాలను శత్రుత్వంగా మార్చుకున్నారు.. ఇమ్రాన్ ఖాన్ ఇప్పుడు మాకు శత్రువు, అతనిని అలాగే చూస్తాం’’ అని తెలిపారు.

ఇలాంటి వ్యాఖ్యలు పాకిస్తాన్‌లో అరాచకానికి దారితీస్తాయా అని అడిగిన ప్రశ్నకు మంత్రి స్పందిస్తూ.. ‘పాకిస్థాన్‌లో ఇప్పటికే అరాచకం ఉంది’ అని సమాధానం ఇచ్చారు. రాణా సనావుల్లా ప్రకటనపై పీటీఐ నేత, మాజీ ఫెడరల్ సమాచార మంత్రి ఫవాద్ చౌదరి మండిపడ్డారు. ‘ఇది పీఎంఎల్ఎన్ సంకీర్ణ ప్రభుత్వం నుంచి ఇమ్రాన్ ఖాన్‌కు ప్రత్యక్షంగా ప్రాణహాని.. సనావుల్లా ముఠా లేదా ప్రభుత్వాన్ని నడుపుతున్నారా? షరీఫ్ నేతృత్వంలోని పిఎంఎల్‌ఎన్‌ని సిసిలియన్ మాఫియాగా సుప్రీం కోర్టు సరిగ్గానే ప్రకటించింది.. అతని ప్రకటన దానికి నిదర్శనం’ అని ఆయన అన్నారు.

ఇమ్రాన్ ఖాన్ ప్రాణాలకు బహిరంగ ముప్పు ఉన్నందున దీనిని గమనించాలని సుప్రీంకోర్టును పీటీఐ కోరింది. ‘ఇమ్రాన్‌ఖాన్‌ను రాణా సనావుల్లా హతమార్చే ఉద్దేశంపై ఎవరికైనా అనుమానం ఉంటే అంతర్గత వ్యవహారాల మంత్రి వర్గానికి చెందిన ప్రత్యక్ష బెదిరింపు.. న్యాయవ్యవస్థ దీన్ని గమనించాలి’ అని పీటీఐ సీనియర్ నేత, మాజీ మంత్రి షిరీన్ మజారీ ట్వీట్‌ చేశారు. పాకిస్థాన్‌లోని ప్రముఖ నాయకుడిని అంతం చేయాలని అధికార పార్టీ బహిరంగంగా ప్రకటించడం గతంలో ఎన్నడూ చూడలేదని పీటీఐ పేర్కొంది.


Read More Latest International News And Telugu News