ప్రపంచ దేశాలకు పాక్‌తోనే పెను ముప్పు?!

పాకిస్థాన్ ప్రపంచంలో అత్యంత ప్రమాదకరమైన దేశమని, దీనితో ప్రపంచ దేశాలకు ముప్పు వాటిల్లుతుందని అమెరికాకు చెందిన నిఘా సంస్థ అధికారులు పేర్కొన్నారు. దెబ్బతిన్న ఆర్థికవ్యవస్థ, ప్రబలిన తీవ్రవాదం, అణు ఆయుధాల సమీకరణలో వేగవంతమైన అభివృద్ధితో పాక్ ప్రమాదికారిగా మారిందని సీఐఏ మాజీ అధికారి కెవిన్ హుల్బర్ట్ అన్నారు. పతనం దిశగా సాగుతోన్న పాక్‌తో ప్రపంచానికి సమస్యలు తప్పవని గతంలో ఇస్లామాబాద్ సీఐఏ కేంద్రం చీఫ్‌గా విధులు నిర్వర్తించిన కెవిన్ హెచ్చరించారు.

పాకిస్థాన్ పతనాన్ని బ్యాంకుతో పోల్చిన హుల్బర్ట్ విపత్తుల ప్రభావంతో గొప్ప అర్థిక వ్యవస్థ ఎలా కుప్పకూలిపోతుందో, అలాగే పాక్ పతనమవుతుందని సీఐఏ వెబ్‌సైట్‌లో పేర్కొన్నారు.

అఫ్ఘానిస్థాన్‌లోని 33 మిలియన్ల జనాభాతోనే అనేక సమస్యలు ఎదుర్కొంటుంటే, అంతకంటే ఐదు రెట్లు ఎక్కువ జనాభా కలిగిన పాకిస్థాన్‌లో ఇంకెంత దారుణమైన పరిస్థితులున్నాయో అర్థం చేసుకోవచ్చని కెవిన్ అన్నారు. సుమారు 19 కోట్లతో ప్రపంచ జనాభాలో ఆరో స్థానంలో ఉన్న పాకిస్థాన్ అత్యంత క్లిష్టమైన పరిస్థితులతో ప్రమాదకారిగా మారిందని తెలియజేశారు.

పాక్ ప్రపంచంలోనే అత్యంత ప్రమాదకరమైన దేశం కాదు, ప్రపంచానికే ఆ దేశంతో ప్రమాదమని మరోసారి హెచ్చరించారు. అమెరికా, ఇంటర్నేషనల్ మానిటరీ ఫండ్ ప్రపంచంలో ఏ దేశానికి చేయనంత బిలియన్ డాలర్ల ఆర్థిక సాయాన్ని పాక్ అనే దెయ్యానికి చేయడం ఆయన పీడకలగా అభివర్ణించాడు.

ఆ దేశానికి ఆర్థిక సాయాన్ని నిలుపుదల చేస్తే అప్పుడైనా తన ప్రవర్తనలో మార్పు వస్తుందని కెవిన్ వ్యాఖ్యానించారు. అఫ్ఘానిస్థాన్‌లో తాలిబన్లను నిలువరించడానికి పోరాటానికి చేస్తున్నామని, పశ్చిమ దేశాలపై దాడికి ప్రయత్నించే తీవ్రవాదులు దీన్ని సురక్షిత స్థావరంగా భావిస్తారని కెవిన్ అన్నారు. మేము ఇక్కడే ఉంటే ఎంతో మంది అమెరికా పౌరులను కోల్పోవాల్సి వస్తుందని కెవిన్ వెల్లడించారు.