భార్యను తుపాకితో కాల్చి, ఆత్మహత్యకు పాల్పడిన మంత్రి!

ఓ సీనియర్ మంత్రి జర్నలిస్ట్ అయిన తన భార్యపై తుపాకితో మూడు రౌండ్లు కాల్పులు జరిపి, తాను కూడా ఆత్మహత్యకు పాల్పడ్డాడు. ఈ ఘటన పాకిస్థాన్‌లోని సింధ్ ప్రావిన్సుల్లో చోటుచేసుకుంది. పాకిస్థాన్ పీపుల్స్ పార్టీకి చెందిన నేత, ప్రణాళిక, పట్టణాభివృద్ధి శాఖ మంత్రి మీర్‌ హజార్‌ ఖాన్‌ బిజ్రానీ తన భార్య ఫరీహా రజాక్‌పై కరాచీలోని తన నివాసంలో మూడుసార్లు తుపాకీతో కాల్పులు జరిపి, ఆపై తాను కూడా అదే రివాల్వర్‌తో కాల్చుకుని ఆత్మహత్యకు పాల్పడ్డారు. దీనికి భార్యాభర్తల మధ్య వ్యక్తిగత కలహాలే కారణమని పోలీసులు ప్రాథమికంగా నిర్థరించారు. భార్యపై బెడ్‌రూమ్‌లో కాల్పులకు పాల్పడిన ఆయన కూడా అక్కడే ఆత్మహత్య చేసుకున్నాడు.

దీనిపై సమాచారం అందుకున్న పోలీసులు రక్తపుమడుగులో ఉన్న మృతదేహాలకు పోస్ట్‌మార్టమ్‌కు తరలించి, పూర్తయిన తర్వాత అధికారలాంఛనాలతో అంత్యక్రియలు నిర్వహించారు. మంత్రి హజార్‌ఖాన్ ఆత్మహత్యకు ముందు భార్యపై కాల్పులు జరిపి ఆమెను హత్యచేశాడని కరాచీ సౌత్ జోన్ డీఐజీ తెలిపారు. ఇద్దరి మృతదేహాల్లోనూ లభ్యమైన బుల్లెట్లు ఒకే రివాల్వర్‌ నుంచి వచ్చినవేనని ఫోరెన్సిక్ సైన్స్ ల్యాబ్ నివేదికలో వెల్లడయ్యింది. ఈ దుర్ఘటన వెనుకు ఇతరుల ప్రమేయం ఉందా అనే కోణంలో దర్యాప్తుజరిపిన పోలీసులకు ఎలాంటి ఆధారాలు లభించలేదు.

రక్తనమూనాలు, వేలిముద్రలు, సీసీటీవీ ఫుటేజ్‌లను సేకరించి పరిశీలించారు. అలాగే మరో ఆరుగుర్ని సైతం విచారించారు. వీరిలో పోలీసు సిబ్బంది, పనివాళ్లు ఉన్నారు. గత కొన్ని రోజులు నుంచి భార్యభర్తల మధ్య గొడవలు జరుగుతున్నట్లు వారి ద్వారా తెలుసుకున్నారు. లోపలి నుంచి గడియపెట్టుకుని ఈ ఘటనకు పాల్పడ్డారు. బెడ్‌రూమ్ నుంచి కాల్పుల శబ్దం వినబడటంతో మంత్రి బిజ్రానీ కుమారుడు, పనివాళ్లు చేరుకుని అతికష్టం మీద తలుపు తెరిచినట్లు పోలీసులు పేర్కొన్నారు.