భగత్ సింగ్‌కు 'జై'కొట్టిన పాకిస్థాన్...!

ఎవరి పేరు వింటే... ప్రతి భారతీయుడి రక్తం ఉప్పొంగుతుందో... దేశమంతా జేజేలు కొడుతుందో... అంతటి మహావీరుడు... భయం ఎరుగని భారతీయుడు మన భగత్ సింగ్. 'హిందూస్థాన్ సోషలిస్ట్ రిపబ్లికన్' ఆర్మీని స్థాపించి... బ్రిటిష్‌ పాలకులకు ఎదురు తిరిగి పిన్నవయసులోనే తన జీవితాన్ని దేశం కోసం అర్పించిన ధీశాలి. భగత్‌ సింగ్‌ కేవలం మీకే కాదు... మాకు కూడా వీరుడే అంటుంది పాకిస్థాన్. వివరాల్లోకి వెళ్తే... భగత్‌సింగ్‌ను 1931, మార్చి 23న బ్రిటీష్ ప్రభుత్వం ఉరితీసిన సంగతి తెలిసిందే. అయితే ఆయనను ఉరి తీసి 87 ఏళ్లు అవుతున్న సందర్భంగా ఆ మహా వీరుడ్ని స్మరించుకుంటూ.. పాకిస్తాన్ ప్రభుత్వం అతనికి సంబంధించిన డాక్యుమెంట్లను ప్రదర్శనకు ఉంచింది.

భగత్‌ సింగ్‌ భారత్‌-పాక్‌ రెండు దేశాలకు చెందిన హీరో అని, బ్రిటీష్‌ ప్రభుత్వంపై ఆ వీరుడు సాగించిన పోరాటాలు ఇరు దేశాల ప్రజలకు తెలియాలనే ఉద్దేశంతోనే ఆయనకు సంబంధించిన డాక్యుమెంట్లను ప్రదర్శనకు ఉంచినట్లు... పాకిస్తాన్‌ అధికారులు తెలిపారు. లాహోర్‌లోని 'అనార్కలీ స్మారక కేంద్రం' వద్ద ఉన్న పంజాబ్‌ రాష్ట్ర 'పురావస్తు' విభాగంలో ఈ డాక్యుమెంట్లను ప్రదర్శనకు ఉంచారు.
పాకిస్థాన్ ప్రభుత్వం ప్రదర్శనకు ఉంచిన పత్రాల్లో... కళాశాలలో భగత్‌ సింగ్‌ ప్రవేశం పొందిన రికార్డులు... భగత్‌ సింగ్‌కు ఉరిశిక్ష విధిస్తూ జారీచేసిన ఉత్తర్వు కాపీ.. ఆయన చదివిన పుస్తకాలు.. జైల్లో ఉన్నప్పుడు వార్తాపత్రికల కోసం భగత్‌ సింగ్‌ పెట్టుకున్న దరఖాస్తులు... జైలు నుంచి భగత్‌ సింగ్‌ తన తండ్రికి రాసిన లేఖలు... కుమారుడి ఉరిశిక్షను రద్దు చేయాలంటూ భగత్‌ సింగ్‌ తండ్రి కోర్టులో దాఖలు చేసిన పిటీషన్‌ కూడా ఉన్నాయి. ఉరిశిక్షను అమలు చేసినట్లు లాహోర్‌ జైలు సూపరింటెండెంట్‌ సంతకంతో ఉన్న పత్రం కూడా ప్రదర్శనలో ఉంచారు. భగత్‌సింగ్ 1907లో సెప్టెంబరు 28న... పాకిస్థాన్‌లోని బాంగాలో జన్మించారు. 1931 మార్చి 23న పాకిస్థాన్‌లోని లాహోర్ జైల్‌లో ఉరితీసిన సంగతి విదితమే...