పాక్‌ పాలన సైన్యం అధీనంలోకేనా?

సుప్రీంకోర్టు తీర్పుతో తప్పనిసరిగా ప్రధాని పదవికి రాజీనామా చేసి, కోర్టు విచారణను ఎదుర్కోవాల్సిన పరిస్థితి నవాజ్ షరీఫ్‌కు దాపురించింది. తదుపరి ఆ దేశ భవిష్యత్తు ఏంటన్న విషయంపై ఆసక్తి నెలకొంది. ప్రజాస్వామ్యాన్ని కొనసాగిస్తూ, పీఎంఎల్-ఎన్ పార్టీకి చెందిన మరో వ్యక్తిని ప్రధానిగా నియమిస్తారా? లేక సైన్యం తన అధీనంలోకి తీసుకుంటుందా? అన్న సందేహాలు వ్యక్తమవుతున్నాయి. ప్రస్తుతం అధికార పీఎంఎల్-ఎన్‌లో షరీఫ్‌కు ప్రత్యామ్నాయంగా ఎదిగిన నాయకుడు లేకపోవడం అతిపెద్ద లోటుగా కనబడుతోంది. ఆయన కుమార్తె మర్యామ్ నవాజ్ ఇప్పటివరకూ పెద్దగా క్రియాశీల రాజకీయాల్లో లేకపోగా, సోదరుడు షహబాజ్ షరీఫ్ పంజాబ్ ప్రావిన్స్‌కు మాత్రమే పరిమితమయ్యారు. ఆయనకు ఒక్క ప్రావిన్షియల్ స్థానం మాత్రమే ఉండటంతో ప్రధాని పదవిని ఇప్పటికిప్పుడు స్వీకరించే అవకాశం లేదని తెలుస్తోంది. తనకు నమ్మినబంటు రక్షణ మంత్రి ఖావాజా ఆసిఫ్‌కు తాత్కాలిక ప్రధానిగా బాధ్యతలు అప్పగించి, ఆపై సోదరుడిని అధికార పీఠంపై కూర్చోబెట్టే నవాజ్ షరీఫ్ ప్రయత్నాలు చేస్తారని రాజకీయ విశ్లేషకులు భావిస్తున్నారు. ఇదంతా సైన్యం ముందడుగు వేయకుంటేనే జరుగుతుంది.

అయితే ఇప్పటివరకూ నవాజ్ షరీఫ్ మూడుసార్లు పాకిస్థాన్ ప్రధానిగా బాధ్యతలు స్వీకరించినా, ఏ ఒక్కసారి కూడా పూర్తి కాలం పదవిలో కొనసాగలేదు. తొలిసారి ప్రధానిగా బాధ్యతలు చేపట్టినప్పుడు 1993లో ఆయన అవినీతి పాల్పడినట్లు ఆరోపణలు ఎదుర్కోవడంతో పదవి నుంచి తొలగించబడ్డారు. ఆ తర్వాత 1999లో సైన్యాధ్యక్షుడు జనరల్ పర్వేజ్ ముషారఫ్ నాయకత్వంలోని సైన్యం నవాజ్ నుంచి అధికారాన్ని చేజిక్కించుకుంది. ఆపై ఇప్పుడు మూడోసారి ఆయన పదవీ కాలాన్ని పూర్తి చేసుకోకుండానే తొలగాల్సిన పరిస్థితి ఏర్పడింది.