నీ చెల్లిని రేప్ చేశాడా.. వాడి చెల్లిని రేప్ చేయ్!

పదహారేళ్ల కూతురిపై తమ కళ్ల ఎదుటే అత్యాచారం చేస్తుంటే.. ఏ తల్లిదండ్రులకైనా ఎలా ఉంటుంది? ఊహించుకోవడానికి చాలా ఇబ్బందికరంగా ఉంది కదూ. మరి పంచాయతీ పెద్దలే ఇలాంటి తీర్పు చెబితే.. వారిని ఏమనాలి..? పాకిస్థాన్‌లోని పంజాబ్ ప్రావిన్స్‌లో ఓ పంచాయతీ పెద్దలు ఇలాంటి తీర్పునే వెలువరించారు. ఇంతకూ ఏం జరిగిందంటే.. ముల్తాన్ జిల్లాలోని రాజ్‌పూర్ గ్రామానికి చెందిన ఓ యువతిని ఉమర్ వాద్దా అనే యువకుడు రేప్ చేశాడు. దీంతో తనకు న్యాయం చేయాలని బాధితురాలు పంచాయతీ పెద్దలను ఆశ్రయించింది.

బాధితురాలు చెప్పిందంతా విన్న పంచాయతీ పెద్దలు.. రేప్ చేసిన వ్యక్తి సోదరిపై.. ఆమె కుటుంబ సభ్యులు చూస్తుండగానే రేప్ చేయాలని బాధితురాలి సోదురుడైన అష్ఫాఖ్‌ను ఆదేశించారు. ఈ తీర్పు సరిగా లేదని ఉమర్ కుటుంబ సభ్యులు పంచాయతీ పెద్దలకు చెప్పగా.. అలా చేస్తేనే న్యాయం జరుగుతుందని పంచాయతీ పెద్దలు తమ తీర్పును సమర్థించుకున్నారు.

దీంతో ఖంగుతిన్న సదరు కుటుంబ సభ్యులు పోలీసులను ఆశ్రయించారు. వివరాలు సేకరించిన పోలీసులు.. 20 మందిని అరెస్ట్ చేసి కటకటాల వెనక్కి నెట్టారు. అంతకు ముందు ఉమర్ యువతిని రేప్ చేశాడా లేదా అని విషయమై కూడా దర్యాప్తు చేపట్టారు. ఈ వ్యవహారం గురించి పత్రికల ద్వారా తెలుసుకున్న పాకిస్థాన్ చీఫ్ జస్టిస్ మియాన్ సాఖిబ్ నిసార్ సమోటోగా స్వీకరించారు. ఈ కేసు గురించి పూర్తి నివేదికను సమర్పించాలని పంజాబ్ ప్రావిన్స్ ఐజీకి ఆదేశాలు జారీ చేశారు.