జపాన్లో భూకంపం.. ఫుకుషిమాలో సునామి హెచ్చరికలు జారీ

జపాన్లో మంగళవారం ఉదయం 6 గంటలకు 7.3 మ్యాగ్నిట్యూడ్తో భారీ భూకంపం సంభవించినట్టు జపాన్ వాతావరణ శాఖ విభాగం తెలిపింది. భూకంపం తీవ్రత అధికంగా ఉండటంతో పసిఫిక్ సముద్ర తీర ప్రాంత వాసులు అప్రమత్తంగా ఉండాల్సిందిగా సునామి హెచ్చరికలు జారీ చేసింది అక్కడి వాతావరణ శాఖ. టోక్యోలో సంభవించిన ఈ భూకంపం కేంద్రం ఫుకుషిమా తీరాన 10 కి.మీ లోతున ఉన్నట్టు వాతావరణ శాఖ గుర్తించింది. ప్రస్తుతానికి ఆస్తి నష్టం గురించి కానీ లేదా ప్రాణ నష్టం గురించి కానీ ఇంకా ఎటువంటి సమాచారం వెలువడలేదు.

ఫుకుషిమా కేంద్రంగా భూకంపం సంభవించడంతో అక్కడి న్యూక్లియర్ ప్లాంట్కి ఏమైనా నష్టం వాటిల్లిందా అనే కోణంలో టోక్యో ఎలక్ట్రిక్ పవర్ కంపెనీ పరిశీలన ప్రారంభించినట్టు స్థానిక పబ్లిక్ బ్రాడ్క్యాస్టర్ ఎన్హెచ్కే పేర్కొంది. ఒనగవాలోని న్యూక్లియర్ పవర్ ప్లాంట్కి ఎటువంటి నష్టం జరగలేదని తోహోకు ఎలక్ట్రిక్ పవర్ కంపెనీ స్పష్టంచేసింది.

ఫుకుషిమా హార్బర్ నుంచి నౌకల్ని ఖాళీ చేసి వెళ్లాల్సిందిగా స్థానికులని అప్రమత్తం చేశారు అక్కడి అధికారులు. 2011లో సంభవించిన భూకంపం కారణంగా అక్కడి న్యూక్లియర్ పవర్ ప్లాంట్లో బీభత్సం చోటుచేసుకున్న సంగతి తెలిసిందే. ఈ నేపథ్యంలో మళ్లీ అటువంటి ప్రమాదం పునరావృతం కాకుండా అధికారులు ముందస్తు జాగ్రత్త చర్యలు చేపట్టారు.