పసిఫిక్ దీవుల్లో భూకంపం... సునామీ హెచ్చరికలు

పపువా న్యూగినియా తీరంలో ఆదివారం ఉదయం భారీ భూకంపం సంభవించింది. భూకంప తీవ్రత రిక్టర్‌ స్కేలుపై 7.9గా నమోదైనట్లు యునైటెడ్ స్టేట్స్ జియోలాజికల్ సర్వే తెలిపింది. దీంతో పసిఫిక్ దీవుల్లో సునామీ వచ్చే అవకాశముందని హెచ్చరికలు జారీ చేశారు. తీరంలో అలలు 0.3 నుంచి 1 మీటరు ఎత్తున ఎగిసిపడే అవకాశం ఉందని పేర్కొంది.

న్యూగినియాకు పశ్చిమాన 40 కిలోమీటర్ల దూరంలో ఉన్న పన్‌గున, బౌగన్‌విల్లే ఐలాండ్‌ల్లోని కొన్ని ప్రాంతాల్లోనూ భూ ప్రకంపనలు చోటుచేసున్నాయి. న్యూగునియా తీరంతోపాటు సాల్మన్ ఐలాండ్, నౌరు, కోస్రే, వనౌతు, చూక్, ఇండోనేషియాలపై భూకంప ప్రభావం ఉంటుందని అమెరికా జియోలాజికల్ సర్వే అధికారులు తెలిపారు. అయితే దీని వల్ల ఆస్ట్రేలియా, న్యూజిలాండ్‌కు మాత్రం ఎలాంటి ప్రమాదం లేదని తెలిపింది.

భూకంప కేంద్రం సముద్రంలోని 95.5 మైళ్లు లోతులో ఉన్నట్టు గుర్తించారు. రింగ్ ఆఫ్ ఫైర్ జోన్‌లో ఈ దీవులు ఉండటం వల్ల తరచూ భూకంపాలు సంభవిస్తాయి. జియోలాజికల్ సర్వే సునామీ వార్నింగ్‌తో న్యూ గినియా అధికారులు అప్రమత్తమయ్యారు. వివత్తును ఎదుర్కొనేందుకు సిద్ధంగా ఉన్నారు. సునామీ హెచ్చరికలతో ప్రజలను సురక్షిత ప్రాంతాలకు తరలించనున్నట్లు సాల్మన్ దీవుల నేషనల్ డిజాస్టర్స్ మేనేజ్‌మెంట్ డైరెక్టర్ లోతీ యతిస్ తెలియజేశారు. భూకంపం వల్ల ఏర్పడిన నష్టంపై పూర్తి వివరాలు తెలియలేదని పపువా న్యూగినియా జియోఫిజికల్ అబ్జర్వేటరీ ఆఫీస్ అసిస్టెంట్ డైరెక్టర్ క్రిస్ మెకై అన్నారు.