ఎలిజబెత్ రాణిది 'మహ్మద్ ప్రవక్త' రక్తమే..!

బ్రిటన్ మహారాణి ఎలిజబెత్... మహ్మద్ ప్రవక్త వంశస్థురాలేనని ఒక తాజా అధ్యయనం వెల్లడించింది. ఈ మేరకు యూకే డెయిలీ మెయిల్ అధ్యయన వివరాలను ప్రచురించింది. ఇప్పటివరకు ఎలిజబెత్ రాణి క్రైస్తవ మతానికి చెందిందని మనందరికీ తెలుసు. అయితే అధ్యయనంలో ఆమె ప్రవక్త కుమార్తె ఫాతీమా ద్వారా కలిగిన సంతానమనీ, స్పెయిన్‌ను పాలించిన అరబ్‌ రాజులు ఎలిజబెత్‌ పూర్వీకులేనని తేలింది. ప్రవక్తకు బ్రిటన్‌ రాణి ఎలిజబెత్‌ 43వ తరం సంతానమని అధ్యయనకారులు తమ పరిశీలనలో తేల్చారు. ఈ సంగతి తాము ఇప్పుడు చెప్తున్నది కాదని, రాజవంశాల గురించి తెలిపే బ్రిటన్ అధికారిక సంస్థ 'బర్కేస్ పీరేజ్' 1986లోనే ఈ నిజాన్ని మొదట ప్రచురించిందని ఆ పత్రిక పేర్కొంది. మొరాకో, అండెలాసియా, ఐరోపాలో పలు సామ్రాజ్యాలను పాలించిన ప్రభువులు ప్రవక్త రక్తసంబంధీకులేనని ఆ అధ్యయనంలో తేలింది. అదే నిజమైతే- 91 ఏళ్ల బ్రిటన్‌ రాణి ఎలిజబెత్‌-2 మొరాకో రాజు మహమ్మద్‌-6, జోర్డాన్‌ రాజు అబ్దుల్లా-2లకు కూడా బంధువు అవుతారని నిపుణులు అభిప్రాయపడుతున్నారు.

మధ్యయుగంలో ముస్లింల పాలనలో ఉన్న స్పెయిన్‌కు చెందిన మహ్మద్ ప్రవక్త కుమార్తె ఫాతిమాకు ఎర్ల్ కేంబ్రిడ్జికి చెందిన ఎలిజెబెత్-2కు రక్తసంబంధం ఉన్నదని అధ్యయనం తెలిపింది. కొన్ని శతాబ్దాల కిందట సెవిలే రాజుగా ఉన్న అల్ ముతామిదిబిన్‌కు నాలుగో భార్య అయిన జైదా అనే ముస్లిం రాజకుమారి... రాజ్యాన్ని వీడి.. క్రైస్తవ మతాన్ని స్వీకరించిందని 'బర్కేస్ పీరేజ్' తెలిపింది. ఆమె కుమారుడు... ఎర్ల్ కేంబ్రిడ్జికి చెందిన రాజవంశీకురాలిని వివాహం చేసుకున్నట్లు పేర్కొంది. అక్కడే ఇందుకు బీజం పడిందని తెలిపింది. అయితే ఈ వాదనతో కొందరు చరిత్రకారులు ఏకీభవించడంలేదు.