వాతావరణాన్ని శాసించే శక్తులు కూడా కిమ్‌‌కు ఉన్నాయట!

ఉత్తర కొరియా నిరంతర అణు, క్షిపణి ప్రయోగాలతో ఏం జరుగుతోందనని ప్రపంచ దేశాలు భయపడుతుంటే, తమ అధినేత కిమ్ జోంగ్ ఉన్‌కు అతీంద్రయ శక్తులున్నాయని వారి అధికారిక మీడియా ప్రచారం చేసుకుంటోంది. అణ్వస్త్ర ప్రయోగాలతో కిమ్‌ను ర్యాకెట్‌ మ్యాన్‌‌గా డొనాల్డ్ ట్రంప్‌ అభివర్ణించగా, ఆయనకు వాతావరణాన్ని కూడా నియంత్రించే శక్తి ఉందని అధికార పత్రిక రొడాంగ్ సిన్మన్ పేర్కొంది. ఆయన కురవమన్నప్పుడే వర్షం కురుస్తుంది... ఆయన ఉదయించమంటేనే సూర్యుడు ఉదయిస్తాడని కథనం ప్రచురించింది. గతవారం 9 వేల అడుగుల ఎత్తైన పెక్తూ మంచు పర్వతాన్ని కిమ్ జోంగ్ అధిరోహించాడు.

దీనిపై రొడాంగ్ సిన్మన్ ఓ కథనాన్ని ప్రచురిస్తూ... అత్యంత క్లిష్టమైన ఈ మంచు పర్వతాన్ని తమ అధినేత అధిరోహించినా, ఏ మాత్రం అలసట లేకుండా ఉన్నారంటే దాని వెనుక ఆయనకున్న అతీంద్రియ శక్తులే కారణమని వ్యాఖ్యానించింది. 9 వేల అడుగుల ఎత్తైన ఈ పర్వతాన్ని అంత సులువుగా ఎక్కలేరు... ఈ పర్వతంపైకి ఎక్కినప్పుడు చిరునవ్వులు చిందిస్తూ కిమ్ తీసుకున్న ఫోటోలు వైరల్ అయ్యాయి. ప్రకృతి నియంత్రణా శక్తే, పర్వతాన్ని సులువుగా అధిరోహించేందుకు కారణమైందని ఉత్తర కొరియా వాసులు సైతం బలంగా నమ్ముతున్నారు. కిమ్, ఉత్తర కొరియా శాస్త్రవేత్తలు సంయుక్తంగా ఓ సరికొత్త ఔషధాన్ని తయారు చేశారని, ఇది ఎయిడ్స్, ఎబోలా సహా ఎన్నో రకాల కేన్సర్లు, నపుంసకత్వం, గుండె జబ్బులను నయం చేస్తుందని, యాంటీ రేడియో యాక్టివ్ గానూ పని చేస్తుందని 'న్యూస్ వీక్' ప్రత్యేక కథనాన్ని అందించింది.

రహస్య మిలటరీ స్థావరంలో కిమ్ జన్మించినప్పుడు ఆకాశంలో రెండు హరివిల్లులు కనిపించాయని ఆయన తండ్రి కిమ్ జోంగ్ 2 తన స్వీయ చరిత్రలో వెల్లడించారు. అంతేకాదు మూడేళ్ల వయసులోనే కారును నడిపినట్లు, తొమ్మిదేళ్లప్పుడు ఈతగాడిగా పోటీపడ్డారని అందులో రాశారు.
రెండు నెలలపాటు స్తబ్ధంగా ఉన్న ఉత్తర కొరియా నవంబరు 29 న హస్వాంగ్ -15 రకం ఖండాంతర బాలిస్టిక్ క్షిపణి పరీక్షించి మరోసారి దుందుడుకు వైఖరి ప్రదర్శించింది. ఈ క్షిపణి 15 వేల కిలోమీటర్ల పరిధిలోని లక్ష్యాలను చేరుకోగలదని, ఇప్పుడు అమెరికా మొత్తం తమ గుప్పిట్లోకి వచ్చిందని తెలిపింది. ఈ ప్రయోగం విజయవంతం కావడంతో పెక్తు పర్వతాన్ని కిమ్ అధిరోహించాడు.