సిరియాలో కూలిన రష్యా విమానం... 39 మంది మృతి

సిరియాలోని ఓ ఎయిర్‌బేస్‌లో ల్యాండ్ అవుతోన్న రష్యా విమానం కూలిన ఘటనలో 39 మరణించారు. సైనిక అవసరాల కోసం వినియోగించే ఈ విమానం మంగళవారం మిమిన్ ఎయిర్‌బేస్‌లో దిగుతోన్న సందర్భంలోనే కూలిపోయినట్టు రష్యా రక్షణ శాఖ అధికారులు వెల్లడించారు. ప్రమాద సమయంలో 33 మంది ప్రయాణికుల సహా ఆరుగురు సిబ్బంది ఉన్నారని, వారంతా ఈ దుర్ఘటనలో మృతిచెందినట్టు అధికారులు తెలిపారు. విమానాన్ని కిందికి దించేందుకు పైలట్లు ప్రయత్నిస్తుండగా మంటల్లో చిక్కుకుని, రన్‌వేకు కేవలం 500 మీటర్ల దూరంలో కూలిపోయినట్టు రష్యా అధికారిక న్యూస్ ఏజెన్సీ టాస్ తెలిపింది. సిరియాలోని రష్యా అతిపెద్ద స్థావరమైన మిమిన్ ఎయిర్‌బేస్‌ను గత డిసెంబరులో అధ్యక్షుడు వ్లాదిమిర్ పుతిన్‌ సందర్శించారు.

ప్రస్తుతం స్వెర్డలోస్క్ ప్రాంతంలో పర్యటిస్తోన్న పుతిన్‌కు ఈ ప్రమాదం గురించి రక్షణ మంత్రి సెర్గి షోయిగ్ తెలియజేశారు. ఈ ఘటనపై దర్యాప్తు ప్రారంభించిన అధికారులు సాంకేతిక లోపమే కారణమని ప్రాథమికంగా నిర్ధరించారు. అంతేకాదు ఈ ఘటన వెనుక రక్షణ నిబంధనల ఉల్లంఘన జరిగిందా? ల్యాండింగ్ సమయంలో తేలికపాటి క్షిపణి ప్రయోగం జరిగిందా? అనే కోణంలోనూ విచారిస్తున్నట్టు అధికారులు తెలిపారు. మరోవైపు విమానం కూలిన ఘటనపై క్రిమినల్ కేసును కూడా నమోదుచేసి విచారణ జరుపుతోన్నట్టు దర్యాప్తు కమిటీ అధికార ప్రతినిధి స్వెత్లానా పెంట్రెంకో వ్యాఖ్యానించారు. రష్యా సైనిక విమానాలు కూలిపోవడం ఇదే తొలిసారి కాదు.

డిసెంబరు 2016లో టుపులోవ్ ట్యూ 154 యుద్ధ విమానం సోచిలోని అడ్లర్ విమానాశ్రయంలో ల్యాండ్ అవుతుండగా కూలిపోయిన ఘటనలో 84 మంది ప్రయాణికులతో సహా ఆరుగురు సిబ్బంది మరణించారు. సిరియాలో విధులు నిర్వహిస్తూ సెలవుల కోసం వచ్చిన 60 మందికి పైగా సైనికులు ఇందులో ఉన్నారు. సైనికుల కోసం ప్రత్యేకంగా నిర్వహించే అలెగ్జ్రాండోవ్ ఎన్సెంబల్ సాంస్కృతిక‌ కార్యక్రమం కోసం వచ్చిన వీరంతా ప్రమాదంలో ప్రాణాలు కోల్పోయారు.