రాజ్యాంగ సవరణల్ని ప్రతిపాదించిన పుతిన్.. రష్యా ప్రధాని సహా మంత్రివర్గం రాజీనామా!

రష్యా ప్రధాని దిమిత్రి మెద్వదేవ్ తన పదవికి రాజీనామా చేశారని తెలుస్తోంది. బుధవారం ఆయన రాజీనామా లేఖను అధ్యక్షుడు వ్లాదిమిర్ పుతిన్‌కు సమర్పించారని ది టాస్ న్యూస్ ఏజెన్సీ వెల్లడించింది. మెద్వదేవ్‌కు పుతిన్ ధన్యవాదాలు తెలిపారని, కానీ విధించిన లక్ష్యాలను చేరుకోవడంలో కేబినెట్ విఫలమైన విషయాన్ని ప్రస్తావించారని రష్యన్ న్యూస్ ఏజెన్సీలు తెలిపాయి. కొత్త కేబినెట్ ఏర్పాటు చేసే వరకు పని చేయాలని మెద్వదేవ్‌కు కేబినెట్‌కు పుతిన్ సూచించారు.

మెద్వదేవ్‌కు పుతిన్‌తో దీర్ఘకాల అనుబంధం ఉంది. దీంతో తన ఆధ్వర్యంలో పని చేసే ప్రెసిడెన్షియల్ సెక్యూరిటీ కౌన్సిల్ డిప్యూటీగా మెద్వదేవ్‌ను నియమించే యోచనలో పుతిన్ ఉన్నారని సమాచారం. 2012 నుంచి ఆయన రష్యా ప్రధాన మంత్రి పదవిలో ఉన్నారు. అంతకు ముందు నాలుగేళ్ల పాటు.. 2008-12 మధ్య ఆయన రష్యా అధ్యక్షుడిగా పని చేశారు. ఆ సమయంలో పుతిన్ రష్యా ప్రధానిగా ఉన్నారు.

ప్రధాన మంత్రి, కేబినెట్ మంత్రుల అధికారాలను పెంచడంతో.. పుతిన్ అనేక రాజ్యాంగ సవరణలను ప్రతిపాదించారు. ఈ సవరణల ప్రకారం భవిష్యత్తులో ఎవరైనా గరిష్టంగా రెండు పర్యాయాలు మాత్రమే రష్యా అధ్యక్షుడిగా పని చేయడం సాధ్యం అవుతుంది. అంతే కాకుండా ప్రధానిని, కేబినెట్ ఎంపిక చేసే అధికారాలను అధ్యక్షుడికి బదులుగా పార్లమెంట్‌కు కట్టబెడతారు. బుధవారం జాతిని ఉద్దేశించి ప్రసంగించిన అధ్యక్షుడు ఈ అంశాలను ప్రస్తావించారు.

2024లో పుతిన్ అధ్యక్ష పదవి నుంచి వైదొలుగుతారు. ఆ తర్వాత తనకోసం ఓ పదవిని సృష్టించుకోవడం కోసం పుతిన్ ప్రయత్నిస్తున్నారని భావిస్తున్నారు. 2000 సంవత్సరం నుంచి పుతిన్ రష్యాను పాలిస్తున్నారు. స్టాలిన్ తర్వాత అత్యధిక కాలం రష్యాను పరిపాలించిన నేత పుతినే కావడం గమనార్హం.