ఆగిపోయిన బంగారు ఎస్కలేటర్.. సౌదీ రాజుకి చేదు అనుభవం!

సౌదీ అరేబియా రాజు సల్మాన్ బిన్ అబ్దులాజిజ్‌కు రష్యాలోని మాస్కో విమానాశ్రయంలో చేదు అనుభవం ఎదురైంది. ఆయన విమానంలో నుంచి దిగుతున్నప్పుడు దానికి అమర్చిన బంగారు మెట్లతో కూడిన ఎస్కలేటర్ మొరాయించింది. దీంతో మెట్లు దిగిరావడానికి ఆయన ఇబ్బంది పడ్డారు. ఈ 81 ఏళ్ల సౌదీ రాజు ఏ దేశ పర్యటనకు వెళ్లినా బంగారు ఎస్కలేటర్, సొంత కార్పెట్‌ను వెంట తీసుకెళ్తారు. అయితే మాస్కో విమానాశ్రయంలో కింగ్ సల్మాన్ విమానం దిగుతుండగా మధ్యలో ఎస్కలేటర్ ఒక్కసారిగా ఆగిపోయింది. దీంతో అక్కడున్నవారంతా కాస్త కంగారుపడ్డారు. మొత్తానికి రాజుగారు జాగ్రత్తగా దిగి అక్కడి నుంచి హోటల్‌కు వెళ్లారు.

నాలుగు చారిత్రాత్మక పర్యటనకు రష్యా వెళ్లిన సల్మాన్.. ఆయన వెంట 1500 మంది ప్రతినిధులను తీసుకువెళ్లారు. రష్యా కాలమానం ప్రకారం అక్టోబర్ 5న సల్మాన్ పర్యటన ప్రారంభమైంది. కింగ్ అండ్ కో నిమిత్తం ‘ఫోర్ సీజన్స్’ అనే హోటళ్లో మొత్తం రూములన్నీ అక్టోబర్ 8 వరకు బుక్ చేసినట్లు వార్తలు వచ్చాయి. అయితే ఈ ఆరోపణలను హోటల్ అధికారులు ఖండించారు. అలాంటిదేమీ లేదని చెప్పుకొచ్చారు. విమానంలో నుంచి దిగడానికి బంగారు ఎస్కలేటర్ వాడుతున్న రాజుగారు.. హోటల్ మొత్తం బుక్ చేసినా ఆశ్చర్యపోనవసరంలేదు.