Netherlands Shooting: ట్రామ్‌పై కాల్పులకు తెగబడిన దుండగుడు

న్యూజిలాండ్‌లోని మసీద్‌పై కాల్పుల ఘటన కళ్ల ముందు మెదులుతుండగానే.. నెదర్లాండ్స్‌లో మరో కాల్పుల ఘటన చోటు చేసుకుంది. నెదర్లాండ్స్‌లోని డచ్ సిటీ ఆఫ్ యుట్రెక్ట్‌లో ట్రామ్‌ ప్రయాణికులపై గుర్తు తెలియని వ్యక్తి ఒకరు విచక్షణారహితంగా కాల్పులు జరిపాడు. ఈ ఘటనలో ఒకరు మరణించగా.. పలువురు గాయపడ్డారు. వెంటనే రంగంలోకి దిగిన పోలీసులు.. దర్యాప్తు ప్రారంభించారు. ఇది ఉగ్రవాద దాడి కావచ్చని అనుమానిస్తున్నారు.

నెదర్లాండ్స్‌లోని డచ్ సిటీ ఆఫ్ యుట్రెక్ట్‌లో సోమవారం ఉదయం ఈ ఘటన చోటు చేసుకుంది. ట్రామ్ వే స్టేషన్‌లో ట్రామ్ కోసం ఎదురు చూస్తున్న ప్రయాణికులపై దుండుగుడు యథేచ్ఛగా జరిపిన కాల్పులు జరిపాడు. కాల్పుల్లో గాయపడిన ఓ మహిళ రోడ్డు మీద పడిపోగా.. రక్షించడానికి నలుగురు వ్యక్తులు ప్రయత్నించారు. వారిపై కూడా దుండగుడు కాల్పులు జరిపాడని స్థానికుడొకరు తెలిపారు.

కాల్పుల ఘటనతో డచ్ ప్రభుత్వం అప్రమత్తమైంది. వెంటనే అత్యవసర భేటీ ఏర్పాటు చేస్తున్నట్టు ప్రధాని మార్క్ రట్టే తెలిపారు. కాల్పులు జరిపిన వ్యక్తికి ఎవరైనా సహకరించారా? అనే విషయం తేలాల్సి ఉంది. ఈ ఘటనలో ఇప్పటి వరకూ ఎవర్నీ పోలీసులు అరెస్ట్ చేయలేదు.