లంక రాజకీయ దుమారం: వెనక్కి తగ్గిన సిరిసేన!

పార్లమెంట్‌పై విధించిన సస్పెన్షన్‌ను తొలగిస్తూ.. శ్రీలంక అధ్యక్షుడు మైత్రిపాల సిరిసేన గురువారం నిర్ణయం తీసుకున్నారు. విక్రమసింఘేను ప్రధాని పదవి నుంచి తొలగించిన సిరిసేన.. శ్రీలంక పార్లమెంట్‌ను నవంబర్ 16 వరకు సస్పెండ్ చేస్తూ కొద్ది రోజుల క్రితం నిర్ణయం తీసుకున్న సంగతి తెలిసిందే. విక్రమసింఘే స్థానంలో రాజపక్సేను ప్రధానిగా నియమిస్తూ.. సిరిసేన నిర్ణయం తీసుకున్నారు. అధ్యక్షుడి నిర్ణయం రాజ్యాంగ విరుద్ధమని రాణిల్ విక్రమసింఘే ఆరోపించారు. ఇప్పటికీ తానే ప్రధానినని వాదించారు.

బలనిరూపణకు వీలుగా పార్లమెంట్‌ను వెంటనే సమావేశపర్చాలని విక్రమసింఘే డిమాండ్ చేశారు. ఈ నేపథ్యంలో పార్లమెంట్‌ను నవంబర్ 16 వరకు సస్పెండ్ చేస్తూ సిరిసేన నిర్ణయం తీసుకున్నారు. సభ్యులను కొనుగోలు చేయడం కోసం రాజపక్సేకు ఉపయోగపడేలా అధ్యక్షుడి నిర్ణయం ఉందని విక్రమసింఘే ఆరోపించారు. తాను విక్రమసింఘేనే ప్రధానిగా గుర్తిస్తున్నట్టు స్పీకర్ ప్రకటించారు. దీంతో లంక రాజకీయం సందిగ్ధంలో పడింది.

పార్లమెంట్‌లో మొత్తం 225 స్థానాలు ఉండగా, విక్రమసింఘే పార్టీకి 113 మంది సభ్యుల బలం ఉంది. మరో ఏడుగురు మద్దతు పలికితే ఆయన సాధారణ మెజార్టీ సాధిస్తారు. స్పీకర్ కరు జయసూర్యతో చర్చించాక పార్లమెంట్‌పై విధించిన సస్పెన్షన్‌ను ఎత్తివేసినట్టు సిరిసేన ప్రకటించారు. అధ్యక్షుడి నిర్ణయంతో పార్లమెంట్ బడ్జెట్ సమావేశాలు వచ్చే వారం ప్రారంభమయ్యే అవకాశం ఉంది.