సోమాలియా అధ్యక్ష భవనంపై ఉగ్రమూకల దాడి

మోగదీషు: ఉగ్రమూకలు ఈ సారి ఏకంగా సోమాలియా అధ్యక్షుడినే టార్గెట్ చేస్తూ దాడులకు పాల్పడ్డారు. అధ్యక్షుడి నివాసం వద్ద మంగళవారం ఆత్మాహుతి దళాలు తమను తాము పేల్చుకుని బీభత్సం సృష్టించారు. అదృష్టవశాత్తు అధ్యక్షుడు హసన్ షేక్ మహబూబ్ భవనం నుంచి ఆ సమయంలో బయటికి రాకపోవడంతో పెను ప్రమాదం నుంచి బయటపడినట్లయింది. కాగా ఈ దాడిలో భవనానికి సమీపంలో ఉన్న హోటల్ పాక్షికంగా దెబ్బతింది.

పోలీసుల కథనం ప్రకారం ఉగ్రమూకలు అధ్యక్షుడినే టార్గెట్ చేసుకొని వచ్చారని.. అయితే భద్రతా సిబ్బంది సోదాల్లో పట్టుబడంతో వారు తొలుత తుపాకీలతో కాల్పులు జరిపి అక్కడిక్కడే ఆత్మాహుతికి పాల్పడినట్లు తెలిసింది. ఉగ్రవాద సంస్థ అల్ ఖైదా అనుబంధ గ్రూప్ అయిన అల్- షబాబ్ కు చెందిన మిలిటెంట్లు ఈ దాడికి పాల్పడినట్లు పోలీసులు అనుమానం వ్యక్తం చేస్తున్నారు. గతంలో అనేక సార్లు ఈ ఉగ్రవాద సంస్థ సోమాలియాలో పలు సార్లు దాడులకు తెగబడిన విషయం తెలిసిందే. ఇటీవలే మోగదీష్ లో జరిపిన కాల్పుల్లో తొమ్మిది మంది పౌరులు ప్రాణాలు కోల్పోయిన విషయం తెలసిందే. ఈ ఘటన నుంచి తేరుకోకముందే ఉగ్రమూకలు మరోసారి దాడికి పాల్పడటంతో స్థానికులు భయం గుప్పిట్లో కాలం గడుపుతున్నారు.