కొరియాను దారికి తేవడానికి ట్రంప్ కొత్త అస్త్రం!!

ప్రపంచ దేశాల హెచ్చరికలను ఖాతరుచేయకుండా క్షిపణ, అణు పరీక్షలను నిర్వహిస్తూ ఘర్షణ వాతావరణాన్ని సృష్టిస్తోన్న‌ఉత్తరకొరియాను దారికి తేవడానికి అమెరికా చర్యలు ప్రారంభించింది. ఆదేశం మాటలతో ఏమాత్రం లొంగదని గుర్తించిన అమెరికా అధ్యక్షుడు ట్రంప్ బలమైన అస్త్రాన్ని ప్రయోగించేందుకు సిద్ధమయ్యారు. తాము హైడ్రోజన్ బాంబును అభివృద్ధి చేశామని ఉత్తరకొరియా ప్రకటించగానే ట్రంప్ ట్విట్టర్ ద్వారా ఆగ్రహం వ్యక్తం చేశారు. అంతేకాదు ఉత్తరకొరియాపై కఠిన ఆంక్షలు విధిస్తూ కొత్త ముసాయిదాను రూపొందిస్తున్నామని అమెరికా ఆర్థిక శాఖ ప్రకటించింది. ఈ ముసాయిదా ప్రకారం ఉత్తరకొరియాతో వ్యాపార కార్యకలాపాలు నిర్వహించే ఏ దేశమైనా తమతో వ్యాపారం చేసేందుకు కుదరదని స్పష్టం చేసింది.

విదేశీ వాణిజ్యం విషయంలో ఉత్తరకొరియా పూర్తిగా చైనాపై ఆధారపడుతోంది. వాణిజ్యంలో 90 శాతం చైనాతో జరుగుతోంది. వారిది అంత బలమైన బంధం కాబట్టి ఉత్తరకొరియాను వదులుకునేందుకు చైనా ముందుకు రాదు. కానీ, ఆంక్షల భయంతో తన మిత్రదేశంపై చైనా ఒత్తిడి పెంచే అవకాశం ఉందని అమెరికా అంచనా వేస్తోంది. సాధ్యం కాకపోతే తమతో వాణిజ్యాన్ని వదులుకోవాలని చెబుతోంది. దీనికి కూడా చైనా సిద్ధంగా లేదు. పోనీ ధైర్యం చేసి అమెరికాతో వాణిజ్య బంధాన్ని వదులు కుంటే అది చారిత్రక తప్పిదమే అవుతుంది. చైనా నుంచి వందల బిలియన్ డాలర్ల విలువైన వస్తువులు అమెరికాకు ఎగుమతి అవుతుంటాయి.

ఉత్తరకొరియాను నిలువరించకపోయి, అమెరికాతో వాణిజ్య సహకారాన్ని వదులు కుంటే చైనాపై తీవ్రమైన ఒత్తిడి పడుతుంది. ఇది అంతర్జాతీయ వాణిజ్యంపై కూడా ప్రభావం చూపే అవకాశం ఉంది. చైనీయులు ఉత్పత్తి చేసిన వస్తువులను మరింత చౌకగా ఇతర దేశాలకు ఎగుమతి చేయాల్సి ఉంటుంది. దీని వల్ల చైనా తీవ్రంగా నష్టపోయే అవకాశం ఉంది. విదేశాల్లో భారీ ఎత్తున పెట్టుబడులు పెట్టడం ద్వారా ప్రపంచవ్యాప్తంగా తన పలుకుబడి పెంచుకోవాలని పరితపిస్తున్న చైనాకు అమెరికా నిర్ణయం శరాఘాతమే. ట్రంప్ ఇలాంటి నిర్ణయం తీసుకుంటే ప్రపంచ స్టాక్ మార్కెట్లు కుప్పకూలుతాయని ఆందోళన వ్యక్తం చేస్తున్నారు.