వివాదస్పద బిల్లు విషయంలో ట్రంప్‌కు ఎదురుదెబ్బ!

అమెరికా అధ్యక్షుడు డొనాల్డ్‌ ట్రంప్‌ వివాదాస్పద నిర్ణయాలపై ఓ పక్క కోర్టులు, ప్రజల నుంచి తీవ్ర వ్యతిరేకత వ్యక్తమవుతోంది. సొంత పార్టీ సభ్యులు కూడా సహకరించేందుకు నిరాకరిస్తున్నారు. హెల్త్‌కేర్ పాలసీ బిల్లు విషయంలో ట్రంప్‌కు ఎదురుదెబ్బ తగిలింది. ఒబామా హెల్త్‌కేర్‌ పాలసీ స్థానంలో కొత్త దాన్ని ట్రంప్‌ ప్రవేశపెడుతున్న సంగతి తెలిసిందే. అయితే ఈ పాలసీకి తగినంత మద్దతును సాధించలేకపోవడంతో ఓటింగ్‌ను వాయిదా వేయాల్సి వచ్చింది.

దీనిపై గత రాత్రే ఓటింగ్‌ జరగాల్సి ఉండగా మెజార్టీ లేకపోవడంతో స్పీకర్‌ ఈ అంశాన్ని నేటికి వాయిదా వేశారు. ఈరోజు కూడా మెజార్టీ సాధ్యం కాని పక్షంలో సోమవారానికి వాయిదా పడే అవకాశం ఉంది.ఈ అంశంపై రిపబ్లికన్‌ సభ్యులకు ట్రంప్ అల్టిమేటం జారీ చేశారు. హెల్త్‌కేర్‌ పాలసీలో మార్పులకు సంబంధించిన సమాచారాన్ని వైట్‌హౌస్‌ బడ్జెట్‌ డైరెక్టర్‌ మిక్‌ ముల్వానే వెల్లడించారు.

ఒకవేళ సభలో ఈ బిల్లు ఆమోదించకపోతే ట్రంప్‌ ఇతర మార్గాల్లో వెళ్తారని ఆయన హెచ్చరించారు. గత అధ్యక్షుడి పాలసీ స్థానంలో వేరే పథకాన్ని ప్రవేశపెట్టేందుకు రిపబ్లికన్లంతా మద్దతివ్వాలని ఆ పార్టీ ఎంపీలతో ట్రంప్ ప్రత్యేకంగా ట్రంప్ ఏర్పాటు చేసిన సమావేశంలో వెల్లడించారు. లేకపోతే చట్టం తీసుకొస్తానని పేర్కొన్నట్లు మీడియా కథనాలు ప్రచురించింది. ఎన్నికల సమయంలో ఇచ్చిన హామీల అమలు కోసం దేశ ప్రజలు ఎదురుచూస్తున్నారని వైట్‌హౌస్‌ ప్రకటించింది.