Sweden: అతి చిన్న వయస్సులోనే మంత్రి పదవి... ఇది మామూలు రికార్డ్ కాదు..!

స్వీడన్‌లో (Sweden) కొత్త ప్రభుత్వం ఏర్పాటైంది. అయితే ఆ దేశ ప్రధాని ఎవరూ ఊహించని నిర్ణయం తీసుకున్నారు. అదే ప్రపంచవ్యాప్తంగా చర్చనీయాంశమైంది. అదేంటనుకుంటున్నారా..? 26 ఏళ్ల అమ్మాయికి మంత్రి పదవిని కట్టబెట్టారు. కొత్తగా ప్రధానిగా నియమితులైన ప్రధాని ఉల్ఫ్ క్రిస్టర్సన్ .. రోమినా పూర్మోఖ్తారీని (Romina Pourmokhtari) పర్యావరణ శాఖ మంత్రిగా నియమించారు. ఇంత చిన్న వయస్సులోనే ఆమె ఈ పదవిని దక్కించుకుని అరుదైన రికార్డును సొంతం చేసుకున్నారు.

పర్యావరణ కార్యకర్త...
రోమినా పర్యావరణ కార్యకర్త. అదే ఆమెకు ఆ పదవిని కట్టబెట్టింది. ఆమె ఇప్పటి వరకు లిబరల్ పార్టీ యువజన విభాగానికి అధిపతిగా ఉన్నారు. రాజకీయాల్లో చాలా చురుకుగా ఉన్నారు. ఇంకో ఆసక్తికరమైన విశేషం ఏమిటంటే.. ప్రస్తుత ప్రధాని క్రిస్టర్సన్‌పై ఎన్నో విమర్శలు గుప్పించారు. సోషల్ మీడియాలో బహిరంగంగానే విమర్శించేది. అయితే రోమినా పార్టీ క్రిస్టర్సన్ పార్టీతో పొత్తు పెట్టుకున్నప్పటి నుంచి రోమినా అతనికి మద్దతుదారుగా మారింది.

టీనేజ్ పర్యావరణ వేత్త...
ఇక రోమినా వ్యక్తిగత జీవితానికి వస్తే.. స్టాక్‌హోమ్ శివార్లలో ఇరానియన్ సంతతికి చెందిన కుటుంబంలో పుట్టింది. రోమినా చిన్నప్పటి నుంచే చదువుల్లో.. ఆటపాటల్లో ముందు ఉండేది. తనకు ఊహ తెలిసిన దగ్గర నుంచి పర్యావరణ రక్షణ కోసం నడుం బిగించింది. తన పట్టుదలతో పర్యావరణం కోసం లక్షలాది మంది యువతతో ఉద్యమాన్ని ప్రారంభించింది. పర్యావరణ నష్టాలపై, ప్రమాదాలపై పెద్ద ఎత్తున చర్చ రేకెత్తించింది. అనతి కాలంలోనే టీనేజ్ పర్యావరణ వేత్తగా రోమినా గుర్తింపబడింది. కాగా స్వీడన్‌లో సోమవారం కొత్త ప్రభుత్వం ఏర్పడింది. రైట్‌వింగ్ పార్టీ, ఇమ్మిగ్రేషన్ వ్యతిరేక పార్టీ డెమోక్రాట్‌ల మధ్య ఒప్పందం కుదిరింది. దాంతో ఈ ఎన్నికల్లో డెమోక్రటిక్ పార్టీ ఆఫ్ స్వీడన్ భారీ విజయం సాధించి రెండో అతిపెద్ద పార్టీగా అవతరించింది. దీంతో క్రిస్టసన్ ప్రధానమంత్రిగా ఎన్నికయ్యారు. ప్రధానమంత్రి అయిన తర్వాతే క్రిస్టర్సన్ రొమేనియాను తన మంత్రి వర్గంలో చేర్చుకున్నారు. దీంతో పాటు కొత్త మంత్రి వర్గాన్ని కూడా ప్రకటించారు.