బ్రిటన్ ప్రధాని బోరిస్ రాజీనామా..!

బోరిస్ జాన్సన్ బ్రిటన్ ప్రధాని పదవికి రాజీనామా చేసేందుకు అంగీకరించారు. కన్జర్వేటివ్ పార్టీ అధినేత పదవికి కూడా ఆయన రాజీనామా చేయనున్నారు. ఈ మేరకు బోరిస్ గురువారమే రిజైన్ చేయనున్నట్టు సమాచారం. యూకే ప్రభుత్వం నుంచి రెండో రోజుల్లో 40 మందికిపైగా మంత్రులు వైదొలిగారు. సొంత పార్టీలోనే ఆయనకు అనేక మంది వ్యతిరేకంగా ఉన్నారు.

నిజానికి మంగళవారం అర్థరాత్రి నుంచి రాజీనామాల పర్వం సాగుతోంది. ఛాన్సలర్ ఆఫ్ ఎక్స్‌చెకర్ రిషి సునక్, ఆరోగ్య కార్యదర్శి సాజిద్ జావిద్ మొదట రిజైన్ చేశారు. యూకే విద్యా మంత్రి మిచెల్ డోనెలన్ గురువారం వారి బాటపట్టారు. ఈ క్రమంలో బోరిస్ రాజీనామా అనివార్యం అయింది. అయితే ఈ ఏడాది అక్టోబర్‌లో జరిగే కన్జర్వేటివ్ పార్టీ సమావేశంలో అధికారికంగా కొత్త నాయకుడిని నియమించే వరకు జాన్సన్ ప్రధానమంత్రిగా కొనసాగనున్నట్టు తెలుస్తుంది. 58 ఏళ్ల జాన్సన్ 2019లో అధిక మెజారిటీతో అధికారంలోకి వచ్చారు. తర్వాత ఆయనపై అనేక ఆరోపణలు వచ్చాయి. అనేక కుంభకోణాల్లో ఆయన పేరు వినిపించింది.