పోర్న్ పిచ్చి.. భర్తను జైలుకు పంపిన ఎంపీ!

తన భర్త పోర్న్ పిచ్చి గురించి తెలుసుకున్నాకా.. అతడిని జైలుకు పంపి, అతడితో విడిపోయిన ఉదంతం గురించి వివరించారు ఆస్ట్రేలియాలోని విక్టోరియా రాష్ట్ర ఎగువసభ ఎంపీ రచల్ కార్లింగ్. నిషేధితం అయిన చైల్డ్ పోర్నోగ్రఫీ పట్ల తన భర్త అమితాసక్తిని కనబరిచాడని, అతడి దగ్గర చైల్డ్ పోర్నోగ్రఫీ కంటెంట్ బోలెడంత ఉందని తను గుర్తించిన వెంటనే.. తనే స్వయంగా పోలీసులకు ఫిర్యాదు చేసి, అరెస్టు చేయించాను అని ఆమె తెలిపారు. అతడు పోర్న్‌కు అడిక్ట్ అయ్యాడనే విషయాన్ని గ్రహించిన వెంటనే తను అతడి ఇంటి నుంచి బయటకు వచ్చానని, కనీసం తన సామాన్లను తెచ్చుకోవడానికి కూడా మళ్లీ వెళ్లలేదని ఆమె పేర్కొన్నారు.

ఆస్ట్రేలియన్ కన్జర్వేటివ్ పార్టీకి చెందిన ఎంపీ రచల్..తన తాజా ప్రసంగంతో ప్రపంచ వ్యాప్తంగా ఆసక్తిని రేపుతున్నారు. తన భర్త శాడిస్టిక్ చర్యల గురించి ఆమె బహిరంగంగా తెలిపారు. ప్రపంచ వ్యాప్తంగా చైల్డ్ పోర్నోగ్రఫీపై ఆందోళన వ్యక్తం అవుతున్న నేపథ్యంలో, చైల్డ్ పోర్నోగ్రఫీని అరికట్టాలని వివిధ దేశాల ప్రభుత్వాలు ప్రయత్నిస్తున్న నేపథ్యంలో.. ఈ మహిళా ఎంపీ ప్రసంగం ఆసక్తిదాయకంగా మారింది.

తన భర్త టెరాబైట్ల పరిమాణంలో చైల్డ్ పోర్నోగ్రఫీని సేకరించి పెట్టుకున్నాడని రచల్ తెలిపారు. గత ఏడాది ఫిబ్రవరి సమయంలో తను ఆ విషయాన్ని గుర్తించానని వివరించారు. వెంటనే తను పోలీసులకు ఫిర్యాదు చేశానని, పోలీసులు అతడిని అదుపులోకి తీసుకుని జైలుకు పంపారని తెలిపారు. అప్పటికే రచల్ పెళ్లై చాలా సంవత్సరాలు అయ్యాయి. వారికి ఒక అబ్బాయి కూడా ఉన్నాడు.

తను, తన కొడుకు కలిసి అతడిపై ఫిర్యాదు చేశామని ఆమె వివరించారు. ఈ ఫిర్యాదును మనసులో పెట్టుకుని.. అతడు తనకు విడాకులు ఇవ్వడానికి నిరాకరిస్తున్నాడని, తన ఆస్తులు తనకు దక్కకుండా చేస్తున్నాడని ఆమె పేర్కొన్నారు.