విజయ్ మాల్యా మళ్లీ బోల్తా కొట్టించాడు

అనుకున్నదే అయ్యింది. లండన్‌లో అరెస్ట్ అయిన విజయ్ మాల్యా అలా అరెస్ట్ అయిన వెంటనే ఇలా బెయిల్‌పై బయటికొచ్చేశాడు. భారత్‌లో విజయ్ మాల్యాపై నమోదైన మనీ లాండరింగ్ కేసులో అతడిని అరెస్ట్ చేసిన పోలీసులు అక్కడి స్థానిక కోర్టులో హజరుపరిచారు. అయితే, భారత్‌లో తాను వివిధ బ్యాంకుల వద్ద వేల కోట్ల రూపాయల రుణం తీసుకుని ఎగ్గొట్టానని వస్తున్న ఆరోపణల్లో నిజం లేదని మొదటి నుంచీ ఖండిస్తూ వస్తోన్న విజయ్ మాల్యా అక్కడి కోర్టులోనూ అదే వాదన వినిపించి మళ్లీ రెండోసారి కూడా బెయిల్ పొందాడని సమాచారం.

భారత్‌లో ప్రభుత్వ రంగ బ్యాంకుల వద్ద దాదాపు రూ.6,000 కోట్ల వరకు రుణం తీసుకున్న విజయ్ మాల్యా ఆ రుణాన్ని తిరిగి చెల్లించకుండానే 2016 మార్చిలో రహస్యంగా బ్రిటన్‌కి పారిపోయాడు. అప్పటి నుంచి అక్కడే తలదాచుకుంటోన్న విజయ్ మాల్యాను 2017 ఏప్రిల్ నెలలో లండన్ పోలీసులు మొదటిసారి అరెస్ట్ చేసి కోర్టులో హాజరుపరిచారు. కానీ అరెస్ట్ అయిన అనంతరం కొద్దిసేపటిలోనే బెయిల్‌పై బయటికొచ్చిన మాల్యా, బ్రిటన్‌లోనూ తన పలుకుబడిని చూపించుకున్నాడు. ఆ తర్వాత మళ్లీ రెండోసారి కూడా అరెస్ట్ అయినట్టే అయి అనుకున్నట్టుగానే బెయిల్‌పై విడుదలయ్యాడు.