అరెస్ట్ అయిన 3 గంటల్లోనే విజయ్ మాల్యాకి బెయిల్

కింగ్ ఫిషర్ ఎయిర్ లైన్స్ వ్యాపార నిర్వహణతోపాటు వివిధ ఇతర వ్యాపారాల కోసం భారత్‌లో వివిధ బ్యాంకులకి దాదాపు రూ.9,000 కోట్ల మేర రుణాలు ఎగ్గొట్టి దేశాన్ని విడిచిపెట్టి బ్రిటన్‌కి పారిపోయిన విజయ్ మ్యాల్యాను లండన్‌లో స్కాట్లాండ్ యార్డు పోలీసులు అరెస్ట్ చేసిన సంగతి తెలిసిందే. అయితే, మాల్యా మాత్రం అరెస్ట్ అయిన 3 గంటల్లోనే బెయిల్ పొందినట్టుగా జీ న్యూస్ పేర్కొంది.

మాల్యా బ్రిటన్ పారిపోయాడనే సమాచారంతో విజయ్ మాల్యాను తమకి అప్పగించాలని ఫిబ్రవరి 8న భారత్ బ్రిటన్‌ని కోరింది. ఇరు దేశాల మధ్య వున్న ఒప్పందం ప్రకారమే భారత్ ఈ విజ్ఞప్తి చేసింది. భారత్‌లో అనేక బ్యాంకులకి రుణం ఎగ్గొట్టి పారిపోయిన మాల్యాని తమకి తిరిగి అప్పగిస్తే, భారతదేశ సమస్యలపై బ్రిటన్ సానుకూల దృక్పథంతో వ్యవహరించినట్టుగా భావిస్తాం అని భారత్ అభిప్రాయపడింది.

భారత్ చేసిన ఈ విజ్ఞప్తి మేరకే అతడిని అదుపులోకి తీసుకున్నప్పటికీ, అరెస్ట్ అయిన తర్వాత కేవలం 3 గంటల్లోనే విజయ్ మాల్యా బెయిల్ పొందినట్టు తెలుస్తోంది.