రష్యాను శత్రువుగా చూడలేం: జర్మనీ

రష్యాను, రష్యా ప్రజలను శత్రువులుగా చూడలేమని జర్మనీ అధ్యక్షుడు ఫ్రాంక్‌ వాల్టర్‌ స్టెయిన్‌మర్‌ వ్యాఖ్యానించారు. రష్యాతో తమకున్న సంబంధాలను దృష్ట్యా రెండు దేశాల మధ్య ఉద్రిక్త పరిస్థితులకు తావు లేకుండా ఉండే దిశగా తగ్గించుకునే దిశగా ఆలోచిస్తున్నామని తెలిపారు. సిరియా విషయంతో అమెరికా, రష్యాల మధ్య పెరుగుతున్న విభేదాలు యుద్ధ వాతావరణాన్ని తలపిస్తున్నాయని అన్నారు. ఇలాంటి పరిస్థితుల్లో ఉద్రిక్తతలు మరింత పెచ్చరిల్లే అవకాశం వుందని, అయినా రష్యాను శత్రువుగా ప్రకటించలేమని, అందుకు తమ చరిత్ర అంగీకరించదని ఆయన స్పష్టం చేశారు.

పశ్చిమ దేశాల నుండి రష్యా ఏకాకి కావడం తమకు చాలా ఆందోళన కలిగిస్తోందని అన్నారు. రష్యా మాజీ గూఢచారిపై విష ప్రయోగం జరిగిన ఘటనను స్టెయిన్‌మర్‌ తీవ్రంగా ఖండించారు. ఇది చాలా తీవ్రమైన విషయమని వ్యాఖ్యానించారు. సిరియాపై అమెరికా నేతృత్వంలో సంకీర్ణ బలగాలు వైమానిక దాడులకు దిగడంతో సిరియా యుద్ధ ప్రాంతాల్లో అమెరికా, రష్యాల మధ్య ప్రత్యక్ష ఘర్షణ నెలకొనే ప్రమాదం పొంచివుందని ఆయన హెచ్చరించారు.