What Rest Of The World Can Learn From Taiwan Coronavirus Response
కరోనా వైరస్ కట్టడిలో తైవాన్ అద్భుత పనితీరు.. ప్రపంచ దేశాలకు స్ఫూర్తి!
ప్రపంచం మొత్తం కరోనా వైరస్ దెబ్బకు విలవిల్లాడుతోంది. డబ్ల్యూహెచ్వో కోవిడ్ను అంటువ్యాధిగా ప్రకటించింది. చైనాలోని వుహాన్ కేంద్రంగా విజృంభించిన ఈ వైరస్.. ప్రపంచ వ్యాప్తంగా 100 దేశాలకు పాకింది. కోవిడ్-19 కారణంగా ప్రపంచ వ్యాప్తంగా 4 వేల మందికిపైగా మరణించగా.. చనిపోయిన వారిలో ఎక్కువ మంది చైనాలోని హుబేయ్ ప్రావిన్స్కు చెందిన వారే. చైనా వైరస్ ప్రభావం పొరుగున ఉన్న దక్షిణ కొరియాతోపాటు పశ్చిమాసియాలో ఉన్న ఇరాన్, యూరప్లో ఉన్న ఇటలీపైనా తీవ్రంగా ఉంది. చైనా తర్వాత కరోనా విజృంభణ ఎక్కువగా ఉన్న దేశాలివే. భారత్లోనూ కరోనా కేసుల సంఖ్య 60 దాటింది. కానీ చైనా పొరుగున ఉన్న తైవాన్లో మాత్రం ఇప్పటి వరకూ 47 కరోనా వైరస్ కేసులు మాత్రమే నమోదు కావడం గమనార్హం. తైవాన్ జనాభా 2.3 కోట్లు కాగా.. గతేడాది 2.7 కోట్ల మంది చైనా నుంచి తైవాన్ వెళ్లొచ్చారు. దీన్ని బట్టే ఇరుదేశాల మధ్య రాకపోకలు ఏ స్థాయిలో ఉంటాయో అర్థం చేసుకోవచ్చు. మిలియన్ల కొద్దీ ప్రజలు చైనా నుంచి వస్తున్నప్పటికీ తైవాన్ కరోనా వైరస్ను సమర్థవంతంగా అడ్డుకోగలిగింది.
Samayam Telugu12 Mar 2020, 12:08 am
ప్రపంచం మొత్తం కరోనా వైరస్ దెబ్బకు విలవిల్లాడుతోంది. డబ్ల్యూహెచ్వో కోవిడ్ను అంటువ్యాధిగా ప్రకటించింది. చైనాలోని వుహాన్ కేంద్రంగా విజృంభించిన ఈ వైరస్.. ప్రపంచ వ్యాప్తంగా 100 దేశాలకు పాకింది. కోవిడ్-19 కారణంగా ప్రపంచ వ్యాప్తంగా 4 వేల మందికిపైగా మరణించగా.. చనిపోయిన వారిలో ఎక్కువ మంది చైనాలోని హుబేయ్ ప్రావిన్స్కు చెందిన వారే. చైనా వైరస్ ప్రభావం పొరుగున ఉన్న దక్షిణ కొరియాతోపాటు పశ్చిమాసియాలో ఉన్న ఇరాన్, యూరప్లో ఉన్న ఇటలీపైనా తీవ్రంగా ఉంది. చైనా తర్వాత కరోనా విజృంభణ ఎక్కువగా ఉన్న దేశాలివే. భారత్లోనూ కరోనా కేసుల సంఖ్య 60 దాటింది. కానీ చైనా పొరుగున ఉన్న తైవాన్లో మాత్రం ఇప్పటి వరకూ 47 కరోనా వైరస్ కేసులు మాత్రమే నమోదు కావడం గమనార్హం. తైవాన్ జనాభా 2.3 కోట్లు కాగా.. గతేడాది 2.7 కోట్ల మంది చైనా నుంచి తైవాన్ వెళ్లొచ్చారు. దీన్ని బట్టే ఇరుదేశాల మధ్య రాకపోకలు ఏ స్థాయిలో ఉంటాయో అర్థం చేసుకోవచ్చు. మిలియన్ల కొద్దీ ప్రజలు చైనా నుంచి వస్తున్నప్పటికీ తైవాన్ కరోనా వైరస్ను సమర్థవంతంగా అడ్డుకోగలిగింది.
పొరుగునే చైనా, రాకపోకలూ ఎక్కువే
చైనా, ద్వీప దేశమైన తైవాన్ మధ్య గగనతల దూరం 100 మైళ్ల లోపే. చాలా మంది తైవాన్ ప్రజలు ఉద్యోగం, వ్యాపారాల కోసం చైనాలో స్థిరపడ్డారు. 2019 చివర్లో కరోనా వైరస్ ప్రభావం మొదలు కాగా.. జనవరి నాటికి వుహాన్లో ఈ కేసుల సంఖ్య బాగా పెరిగింది. చాంద్రమానం ప్రకారం చైనీయులు, తైవాన్ ప్రజలు నూతన ఏడాదిని జరుపుకొంటారు. కరోనా విజృంభణ మొదలయ్యాక న్యూ ఇయర్ సెలబ్రేషన్స్ జరగ్గా.. ఈ వేడుకల కోసం చైనా నుంచి తైవాన్ వ్యాపారులు భారీ సంఖ్యలో కుటుంబాలతో సహా స్వదేశానికి చేరుకున్నారు. అదే సమయంలో రోజుకు 2 వేల మంది చొప్పున చైనా పర్యాటకులు తైవాన్ను సందర్శించారు. ఈ స్థాయిలో రాకపోకలు ఉంటే మరో దేశంలోనైతే కరోనా కేసులు వేలల్లో నమోదయ్యేవి. కానీ తైవాన్ తీసుకున్న జాగ్రత్త చర్యల వల్ల అక్కడ 47 మందికి మాత్రమే వైరస్ సోకగా.. ఒక్కరు మాత్రమే చనిపోయారు.
ముందే అప్రమత్తమైన తైవాన్
చైనాలో 80 వేల మందికిపైగా కరోనా సోకగా.. 3100 మందికిపైగా ప్రాణాలు కోల్పోయారు. డ్రాగన్కు పొరుగున ఉన్న దక్షిణ కొరియాలోనూ 7500 మందికిపైగా కరోనా బారిన పడ్డారు. జపాన్లోనూ 530 కరోనా కేసులు నమోదయ్యాయి. ఇటలీలో కోవిడ్ వాధితుల సంఖ్య 9 వేలు దాటగా.. అమెరికాలో 700 దాటింది. వందకుపైగా దేశాలు కరోనా బారిన పడితే.. చైనాకు అత్యంత సమీపాన ఉన్న తైవాన్లో ప్రతి ఐదు లక్షల మందిలో ఒక్కరు మాత్రమే ఈ ఇన్ఫెక్షన్ బారిన పడ్డారు. చైనాకు అత్యంత సమీపంలో ఉండటం, వాడుకలో ఉండేది ఒకే భాష కావడంతో.. వుహాన్లో తీవ్రమైన న్యుమోనియా విస్తరిస్తోందని తెలియగానే తైవాన్ అప్రమత్తమైంది. ముందు జాగ్రత్త చర్యలు తీసుకుంది.
Image: Twitter
మిగతా దేశాల కంటే చాలా ముందే..
చైనాలో గుర్తు తెలియని న్యుమోనియా కేసులు భారీగా నమోదవుతున్నాయని డిసెంబర్ 31న ప్రపంచ ఆరోగ్య సంస్థ గుర్తించింది. వెంటనే అప్రమత్తమైన తైవాన్ సెంటర్స్ ఫర్ డిసీజ్ కంట్రోల్ వుహాన్ నుంచి వస్తోన్న ప్రయాణికులను పరిశీలించాలని అదే రోజున ఆదేశించింది. చైనాతో సంబంధాలు బాగోలేకపోయినప్పటికీ.. కరోనా ఫ్యాక్ట్ ఫైండింగ్ కోసం చొరవ తీసుకొని మరీ తైవాన్ పొరుగు దేశానికి నిపుణుల బృందాన్ని పంపింది. ఈ టీం తైవాన్ తిరిగొచ్చిన తర్వాత చైనాలో ఏదో తేడా కొడుతుందని భావించి.. కరోనా కోసం హాస్పిటళ్లను సన్నద్ధం చేశారు. ఇన్ఫెక్షన్ బారిన పడ్డ వారిని గుర్తించి వేరుగా ఉంచడంతోపాటు దేశంలో వైరస్ వ్యాప్తి చెందకుండా తైవాన్ జాగ్రత్త పడింది. జనవరి 21న తైవాన్లో తొలి కరోనా కేసు నిర్ధారణ కాక ముందే, మిగతా ప్రపంచ దేశాలు అప్రమత్తం కాకముందే తైవాన్ జాగ్రత్త చర్యలు చేపట్టింది.
తైవాన్ ఇంతగా అప్రమత్తం కావడానికి 2003 నాటి సార్స్ (SAARS) ఎఫెక్ట్ కారణం. ఈ వైరస్ కారణంగా అప్పట్లో తైవాన్లో 73 మంది చనిపోయారు. చైనా, హాంగ్కాంగ్ల వెలుపల అత్యధిక సార్స్ మరణాలు నమోదైంది తైవాన్లోనే. సార్స్ ప్రభావం తైవాన్ ఆర్థిక వ్యవస్థపై బలంగా పడింది. దీంతో భవిష్యత్తులో ఇలాంటి ఉపద్రవాలు తలెత్తితే.. సమర్థవంతంగా ఎదుర్కోవడం కోసం తైవాన్ ప్రభుత్వం ఓ చట్టం చేసింది. ఇలాంటి ముప్పులను ఎదుర్కోవడం కోసం నేషనల్ హెల్త్ కమాండ్ సెంటర్ (ఎన్హెచ్సీసీ) ను ఏర్పాటు చేశారు. వుహాన్లో కరోనా వైరస్ సోకుతుందనే వార్తలు రాగానే ఎన్హెచ్సీసీ స్పందించింది. 2003 నాటి సార్స్ తర్వాత జ్వరం, జలుబు లాంటి లక్షణాలతో బాధపడుతున్న వారిని గుర్తించేందుకు తైవాన్ ఎయిర్పోర్ట్లలో ఏర్పాట్లు చేయడం కలిసొచ్చింది.
టెక్నాలజీ సాయం
విదేశాల నుంచి వచ్చే ప్రయాణికులు క్యూఆర్ కోడ్ స్కాన్ చేసి తమ ట్రావెల్ హిస్టీరి, ఆరోగ్య వివరాలను ఆన్లైన్లోనే రిపోర్ట్ చేసే విధానాన్ని తైవాన్ డెవలప్ చేసింది. ఈ డేటాను నేరుగా తైవాన్ డిసీజ్ కంట్రోల్ సెంటర్లకు ఇచ్చారు. కరోనా బారిన పడ్డ దేశాల నుంచి వచ్చిన వారికి అనారోగ్యం లేకపోయినా సరే 14 రోజులపాటు వారి ఇళ్లలోనే క్వారంటైన్లో ఉంచారు. ఫోన్ల ద్వారా లోకేషన్ షేర్ చేయించారు. ఇలా చేయని వారికి, కరోనా లక్షణాల గురించి బయటకు చెప్పని వారికి భారీగా జరిమానాలు విధించారు. వుహాన్ నుంచి తిరిగొచ్చిన ఓ వ్యక్తిలో కరోనా లక్షణాలు కనిపించాయి. కానీ అతడు అధికారులకు సమాచారం ఇవ్వలేదు. అతడు డ్యాన్స్ క్లబ్కు వెళ్లాడని గుర్తించిన అధికారులు మరుసటి రోజే 10 వేల డాలర్ల జరిమానా విధించారు.
Image Source: SitePoint
నియంత్రణ చర్యలు ఇలా..
జనవరి 20 నుంచే తైవాన్ ఆరోగ్య మంత్రి చెన్ షిహ్ చుంగ్ స్వయంగా కరోనా నియంత్రణ చర్యలను పర్యవేక్షించడం ప్రారంభించారు. కోవిడ్ గురించి రోజూ సమావేశాలు ఏర్పాటు చేయడం, ప్రజలకు సమాచారం ఇవ్వడానికి ప్రాధాన్యం ఇచ్చారు. కరోనాను సీరియస్గా తీసుకోవాలని అర్థమయ్యాక.. దీన్ని కట్టడి చేయడం కోసం 60 బిలియన్ న్యూ తైవాన్ డాలర్లు (2 బిలియన్ డాలర్ల)ను ప్రభుత్వం కేటాయించింది. సరిహద్దుల వద్ద నియంత్రణ చేపట్టడంతోపాటు.. పెయిడ్ లీవ్లు మంజూరు చేయడం, ఫేస్ మాస్క్ల లాంటి అత్యవసరాలను ఉత్పత్తి చేయడం, ఇన్ఫెక్షన్ ఎక్కడి నుంచి మొదలైందో తెలుసుకోవడం, ఒకరి నుంచి మరొకరికి సోకే రిస్క్ను తగ్గించడంపై శ్రద్ధ పెట్టింది. ఎవరికైనా కరోనా సోకిందనే నిర్ధారణ కాగానే.. వెంటనే వారు కలిసిన వారందరికీ పరీక్షలు నిర్వహించి వారిని ఇళ్ల నుంచి బయటకు రానీయకుండా క్వారంటైన్లో ఉంచారు. రిపోర్టుల్లో నెగెటివ్ వచ్చిన వారికి సైతం మళ్లీ మళ్లీ పరీక్షలు నిర్వహించారు.
రోజుకు పది లక్షల మాస్కుల ఉత్పత్తి
మాస్కుల ఎగుమతిపై తైవాన్ నిషేధం విధించింది. కరోనా ప్రభావంతో ఇతర దేశాలు మాస్కుల కొరతను ఎదుర్కొంటుంటే.. తైవాన్ రోజుకు పది లక్షల మాస్కులను తయారు చేయగలిగింది. ఆన్లైన్లోనూ మాస్కులను అందుబాటులో ఉంచింది. భారీగా మాస్కులను ఉత్పత్తి చేయడంలో తమ దేశానికి చెందిన సూక్ష్మ, మధ్యతరహా పరిశ్రమల కృషి ఎంతో ఉందని తైవాన్ ఆరోగ్య మంత్రి ప్రశంసించారు. అంతే కాదు కృతిమ కొరత లేకుండా తక్కువ ధరలకే మాస్కులను సామాన్యులకు అందుబాటులో ఉంచింది. రేడియోలు, టీవీల ద్వారా కరోనా గురించి అవగాహన కల్పించారు. చేతులు శుభ్రంగా కడుక్కోవాలని, మాస్కులు ధరించాలని పదే పదే చెప్పారు. దీంతో ప్రజలు ఆందోళన చెందకుండా.. నిశ్చింతగా ఉండగలిగారు.
తైవాన్ ప్రజలకు కరోనా పట్ల అవగాహన ఏ స్థాయిలో ఉందంటే.. 95 శాతం మంది తల్లిదండ్రులు తమ పిల్లలు ఇంట్లో నుంచి బయల్దేరడానికి ముందే వారి శరీర ఉష్ణోగ్రత ఎంతుందో చూసి స్కూళ్లకు రిపోర్టు పంపుతారు. కొన్ని చోట్ల సంస్థలు కూడా తమ ఉద్యోగులు ఆఫీసులోకి వస్తున్నప్పుడే వారి టెంపరేచర్ చెక్ చేసే ఏర్పాట్లు చేశారు. ఈ ప్రక్రియ సక్రమంగా ఉందో తెలుసుకోవడం కోసం లాబీల్లో కెమెరాలను ఏర్పాటు చేశారు. అన్ని చోట్లా శానిటైజర్లు అందుబాటులో ఉంచారు. టీవీ షోలు, సెలబ్రిటీల ద్వారా కూడా ప్రజలకు అవగాహన కల్పించారు. ప్రభుత్వం తీసుకున్న చర్యలకు తోడు ప్రజలు స్వచ్ఛందంగా సహకరించడం ఎంతో కలిసి వచ్చింది.
WHOలో సభ్యత్వం లేకపోయినప్పటికీ..
కరోనాను అడ్డుకోవడానికి తైవాన్ హెల్త్ కేర్ సిస్టమ్ కూడా ఉపకరించింది. 1995లో ప్రారంభమైన తైవాన్ హెల్త్ ఇన్సూరెన్స్ దేశంలో నివసించే 99 శాతం మందికి సమగ్ర వైద్య సేవలను అందిస్తోంది. ప్రపంచంలోనే ఇది అత్యుత్తమైందిగా పేరొందింది. ఆరోగ్య బీమా ద్వారా ఉచితంగా కరోనా పరీక్షలు నిర్వహించారు. ఐసోలేషన్లో ఉంచాల్సి వస్తే ఉచితంగా ఆహారం, వసతి, మందులను అందించారు. ఆర్థిక భారం లేకపోవడంతో అందరూ డాక్టర్ను సంప్రదించగలిగారు. ప్రభుత్వ ముందస్తు సన్నద్ధతకు ప్రజల సహకారం తోడవటంతో కరోనా వైరస్ వ్యాప్తిని తైవాన్ సమర్థవంతంగా ఎదుర్కొంది. చైనా కారణంగా తైవాన్ను స్వతంత్ర దేశంగా గుర్తించడానికి చాలా దేశాలు అంగీకరించలేదు. అంతే కాదు.. ప్రపంచ ఆరోగ్య సంస్థలో తైవాన్కు సభ్యత్వం లేదు. కనీసం పరిశీలన దేశ హోదా కూడా లేదు. దీంతో కరోనా ఆరోగ్య జాగ్రత్తల గురించి, ఎదుర్కోవడం ఎలా అనే అంశంపై మిగతా దేశాల సలహాలు, సూచనలను పొందలేకపోయింది. కానీ తైవాన్ కరోనాను కట్టడి చేసి తీరు ప్రపంచ దేశాలకు ఆదర్శం.
We use cookies and other tracking technologies to provide services in line with the preferences you reveal while browsing the Website to show personalize content and targeted ads, analyze site traffic, and understand where our audience is coming from in order to improve your browsing experience on our Website. By continuing to browse this Website, you consent to the use of these cookies. If you wish to object such processing, please read the instructions described in our privacy policy/cookie policy.