సెక్స్ బానిసగా మార్చి.. సొంత బిడ్డ మాంసాన్ని తినిపించి

లాలపోసి.. పాలు పట్టి.. మురిపెంగా ముద్దాడిన బిడ్డను కన్న తల్లే ఆహారంగా తీసుకోవాల్సి వస్తే..? తన ప్రాణాలనైనా వదులుతుందేమో గానీ.. ఏ తల్లీ అలాంటి పాపం చేయలేదు కదూ. కానీ ఐసిస్ ఉగ్రవాదుల పైశాచికత్వం.. కన్నపేగు బంధాన్ని పరిహాసమాడింది. మనిషి రూపంలో ఉన్న నరమాంస భక్షకుల కారణంగా బిడ్డను కంటికి రెప్పలా కాపాడే తల్లి.. తనకు తెలియకుండానే సొంత బిడ్డనే ఆహారంగా తినాల్సిన దుస్థితి తలెత్తింది. ఒళ్లు గగుర్పొడ్చే ఈ ఘటన ఇరాక్‌లో చోటు చేసుకుంది. వివరాల్లోకి వెళ్తే..

ఉత్తర ఇరాక్‌లో యాజిది అనే మైనార్టీ వర్గానికి చెందిన మహిళలను ఐసిస్ ఉగ్రవాదులు సెక్స్ బానిసలుగా మార్చేస్తూ.. తమ లైంగిక వాంఛలను తీర్చుకుంటున్నారు. ఆ వర్గానికి చెందిన ఓ చంటి బిడ్డ తల్లిని గదిలో బంధించిన ఉగ్రవాదులు మూడు రోజులపాటు తినడానికి ఏమీ ఇవ్వలేదు. కనీసం తాగడానికి మంచి నీళ్లు కూడా ఇవ్వకుండా తీవ్రంగా ఇబ్బంది పెట్టారు. ఆకలి బాధతో విలవిల్లాడుతున్న ఆ మహిళకు మరుసటి రోజు అన్నం వడ్డించారు. అందులో మాంసం వడ్డించారు. ఆకలితో నకనకలాడుతున్న ఆమె ఆబగా తినేసింది.

తిన్న తర్వాత వెకిలి నవ్వు నవ్విన ఉగ్ర రాక్షసులు.. ‘నీకు భోజనంలో వడ్డించింది ఏడాది వయసున్న నీ బిడ్డ మాంసం’ అని చెప్పడంతో.. ఆమె కాళ్ల కింద భూమి కంపించింది. బాధతో కుమిలిపోయింది.

ఈ విషయాన్ని ఇరాక్ ఎంపీ ఒకరు బహిర్గతం చేశారు. ఉగ్రవాదుల చెర నుంచి బయటపడిన ఓ మహిళ తనకు ఈ విషయం చెప్పిందని, మూడు రోజులపాటు ఆమెను చిత్రవధ పెట్టిన దుర్మార్గులు సొంత బిడ్డ మాంసాన్ని ఆమెతో తినిపించారని చెబుతూ ఆయన ఉద్వేగానికి లోనయ్యారు. ఐసిస్ ఉగ్రవాదుల అరాచకానికి ఇది కేవలం ఒక ఉదాహరణ మాత్రమే. బయటకు రాని ఇలాంటి ఉదంతాలు ఎన్నో..