అమెరికాలో వరంగల్ యువతిపై కాల్పులు

అమెరికాలో భారతీయులపై జాతి విద్వేష దాడుల పరంపర కొనసాగుతున్నాయి. ముఖ్యంగా తెలుగు వాళ్లను లక్ష్యంగా చేసుకుని దుండగులు కాల్పులకు తెగబడుతున్నారు. తాజాగా వరంగల్‌కు చెందిన జ్యోతి అనే యువతిపై ఓ నల్ల జాతీయుడు కాల్పులు జరిపాడు. డబ్బులు డిమాండ్ చేస్తూ నిందితుడు జ్యోతిని తుపాకితో కాల్చాడు. ఈ కాల్పుల్లో గాయపడ్డ ఆమెను చికిత్స కోసం ఆస్పత్రికి తరలించారు.

జ్యోతి ప్రస్తుతం కాలిఫోర్నియా సమీపంలోని ఫ్రీమౌంట్‌లో నివాసం ఉంటోంది. షాపింగ్ కోసం వచ్చిన బయటకు వచ్చిన ఆమె తన కారును పార్కింగ్ చేసి వస్తుండగా దుండగుడు కాల్పులు జరిపాడు. ఈ ఘటనలో ఆమె చేతికి తీవ్రగాయాలయ్యాయి. కాల్పులకు తెగబడ్డ నిందితుడు ప్రస్తుతం పరారీలో ఉన్నాడు. అతడి కోసం పోలీసులు గాలింపు చర్యలు చేపట్టారు. గత వారం రోజులుగా భారతీయులపై జాత్యాహంకార దాడులు చోటు చేసుకుంటున్నాయి.

గత ఫిబ్రవరి 13 న వరంగల్‌కు వంశీచరణ్ రెడ్డి, ఫిబ్రవరి 28 కన్సస్ సిటీలో కూచిభొట్ల శ్రీనివాసరావు, మార్చి 4 న సౌత్ కరోలినాలో గుజరాత్‌కు చెందిన హర్నిశ్ పటేల్ అనే వ్యాపారి దుండగులు జరిపిన కాల్పుల్లో ప్రాణాలు కోల్పోయారు. దేశాధ్యక్షుడిగా డోనాల్డ్ ట్రంప్ బాధ్యతలు చేపట్టిన తర్వాత వరుసగా భారతీయులే లక్ష్యంగా జాతి విద్వేష దాడులు చోటు చేసుకుంటున్నాయి