రూ.6 లక్షల పెట్టుబడి.. 19 ఏళ్లకే రూ. 103 కోట్ల సంపాదన

బ్రిటన్‌లోని పిన్న వయస్కులైన మిలియనీర్ల జాబితాలో భారత సంతతి టీనేజర్ చోటు సంపాదించాడు. ఆన్‌లైన్‌లో ఇళ్లను అమ్మిపెట్టే అక్షయ్ రూపారేలియా 19 ఏళ్లకే కోటీశ్వరుడయ్యాడు. తోటి వారంతా ఆటలు ఆడుతుంటే.. ఈ కుర్రాడు మాత్రం.. చదువుకుంటూనే వ్యాపారం చేస్తూ కోట్లు సంపాదిస్తున్నాడని డెయిలీ మిర్రర్ తెలిపింది. www.doorsteps.co.uk అనే స్థిరాస్థి సంస్థను నెలకొల్పిన అక్షయ్ 16 నెలల వ్యవధిలోనే 100 పౌండ్ల విలువైన ఇళ్లను అమ్మిపెట్టి.. 12 మిలియన్ పౌండ్లు సంపాదించాడు.

బంధువుల దగ్గర్నుంచి ఏడు వేల పౌండ్లు అప్పుగా తీసుకొని అక్షయ్ వ్యాపారాన్ని ప్రారంభించాడు. 12 మందితో మొదలైన ఈ వ్యాపారం అద్భుతంగా సాగడంతో పెట్టుబడులు పెట్టేందుకు చాలా మంది ముందుకొచ్చారు. ఇప్పటికే అక్షయ్ పెట్టుబడుల రూపంలో 5 లక్షల పౌండ్లు అందుకున్నాడు. ఇళ్లు అమ్మడానికి, కొనుగోలు చేయడానికి వేరే వాళ్లు భారీగా కమీషన్ వసూలు చేస్తుంటే ఇతడు మాత్రం కేవలం 99 పౌండ్లు మాత్రమే వసూలు చేస్తున్నాడు. ప్రస్తుతం ఆ సంస్థ యూకేలో 18వ అతిపెద్ద స్థిరాస్తి సంస్థగా నిలిచింది.

ఇంటి దగ్గర ఉండి స్వయం ఉపాధి పొందాలని భావిస్తున్న తల్లులతో ఇతడు నెట్‌వర్క్ ఏర్పాటు చేశాడు. వారే ఇతడికి క్లయింట్లను చూపించి ఆస్తుల అమ్మకాల్లో కీలకపాత్ర పోషిస్తున్నారు. ఆక్స్‌ఫర్డ్‌ విశ్వవిద్యాలయంలో చదువుకునే అవకాశం వచ్చినప్పటికీ అక్షయ్‌ వ్యాపార విస్తరణకే మొగ్గు చూపుతున్నాడు.