H-1 B వీసాలపై ఇండియన్స్‌‌కు మరో కొత్త సమస్య

హెచ్‌-1బీ వీసాలపై భారతీయులకు మరో కొత్త సమస్య మొదలైంది. ఈ వీసాలపై అమెరికా వెళ్లిన వారి జీవితభాగస్వాములకు వర్క్‌ పర్మిట్‌పై ఆందోళన నెలకొంది. హెచ్‌-1బీ వీసాలున్న వారి జీవితభాగస్వాములకు పనిచేసే అవకాశాన్ని కల్పిస్తూ 2015లో అప్పటి అధ్యక్షుడు ఒబామా నిబంధనలను సరళతరం చేశారు. దీని వల్ల ప్రపంచంలోని ప్రతిభావంతులను ఆకర్షించడానికి అమెరికాకు సహాయపడుతుందని ఒబామా పేర్కొన్నారు.

అయితే ఈ నిర్ణయాన్ని వ్యతిరేకిస్తూ పలు అమెరికన్‌ సంస్థలు ఫెడరల్‌ కోర్టును ఆశ్రయించాయి. దీనిపై స్పందించాల్సిదిగా ప్రస్తుత అధ్యక్షుడు డొనాల్డ్‌ ట్రంప్‌ యంత్రాంగాన్ని ఫెడరల్ కోర్టు కోరింది. ఈ విషయంపై స్పందించడానికి 60 రోజుల సమయం కావాలంటూ ట్రంప్‌ అడ్మినిస్ట్రేషన్ విభాగం కోర్టుకు విన్నవించింది. తదుపరి ట్రంప్ ఎలాంటి నిర్ణయం తీసుకుంటారోనని హెచ్‌-1బీ వీసాలపై వెళ్లిన భారతీయుల్లో దిగులు పట్టుకుంది.

హెచ్‌-1బీ వీసాలపై ఉన్న జీవితభాగస్వాములకు వర్క్‌ పర్మిట్‌ విషయంలో విచారణను 60 రోజుల పాటు వాయిదా వేయాలని, దీనిపై తమకు సమయం కావాలని డిస్ట్రిక్ట్‌ ఆఫ్‌ కొలంబియా సర్క్యూట్‌ అప్పీల్స్‌ కోర్టులో అమెరికా యంత్రాంగం పిటిషన్‌ దాఖలు చేసింది. అలాగే దీనిపై కొత్త అధ్యక్షుడి నిర్ణయం తీసుకోవడానికి సమయం అవసరమని కోరింది. ప్రస్తుతం అటార్నీ జనరల్‌‌గా ఉన్న జెఫ్‌ సెషన్స్‌ హెచ్‌-1బీపై వచ్చిన వారి భాగస్వాములకు వర్క్‌ పర్మిట్‌ ఇవ్వడాన్ని వ్యతిరేకిస్తున్నారు. ఈ నిబంధనలతో అమెరికా పౌరులకు నష్టం కలుగుతోందన్నారు.

తమ ఉద్యోగాలను కాపాడాలంటూ అమెరికాలోని వలసదారులు కోర్టులో మరో వ్యాజ్యం దాఖలు చేశారు. అమెరికా పౌరులైన తమ పిల్లల హక్కులను కాపాడడానికి ఇది ఒకే ఒక దారి అని ఇమ్మిగ్రేషన్‌ వాయిస్‌ సంస్థ సహవ్యవస్థాపకులు అన్నారు. హెచ్‌-1బీ వీసాలపై అమెరికా వెళ్లిన వారిలో భారతీయుల శాతమే ఎక్కువ. దీంతో హెచ్‌-4 ఏఈడీ వర్క్‌ పర్మిట్‌పై ఇప్పటికే ఉద్యోగాలు, వ్యాపారాలు చేసుకుంటున్న ఎంతోమంది ఆందోళనలో ఉన్నారు.