దుబాయ్ లాటరీలో రూ.12 కోట్లు గెలుపొందిన కేరళ వాసి!

అబుదాబి బిగ్ లాటరీ‌లో ఓ భారతీయుడు రూ.12 కోట్ల గెలుచుకున్నాడు. కేరళకు చెందిన 33 ఏళ్ల శ్రీరాజ్ కృష్ణన్ కొప్పరెంబిల్ ఆదివారం ప్రకటించిన అబుదాబీ బిగ్ టికెట్ డ్రాలో 7 మిలియన్ దిర్హామ్‌లు అంటే సుమారు రూ.12.72 కోట్లు గెలుపొందాడు. శ్రీరాజ్ ఉపాధి కోసం భార్యతో సహా అబుదాబికి వలసవెళ్లాడు. అక్కడ ఓ షిప్పింగ్ సంస్థలో కో-ఆర్డినేటర్‌గా ఆయన విధులు నిర్వహిస్తున్నాడు.

ఆయనకు ప్రతీ నెలా వచ్చే 6 వేలు దిర్హామ్‌లు అంటే రూ.1.9 లక్ష జీతంలోంచి ఇంటి లోను చెల్లిస్తూ, భార్యకు వచ్చే జీతం సహా కొంత మొత్తాన్ని పొదుపు చేసుకునేవాడు. కానీ అదృష్టం అతన్ని వరించడంతో కోటీశ్వరుడైపోయాడు. ఒకే ఒక్క లాటరీ అతడి జీవితాన్నే మార్చేసింది. తనకు లాటరీ టిక్కెట్లు కొనడం అలవాటని, అదే క్రమంలో అబుదాబీ బిగ్ లాటరీ టికెట్ నెంబరు 44698 కొనుగోలు చేశానని శ్రీరాజ్ కృష్ణన్‌ తెలిపాడు.

ఇది నా లక్కీ నెంబర్ అని, అయితే లాటరీలో వరించినట్లు సమాచారం తెలిసినప్పుడు ఒక్క నిమిషం కలలా అనిపించిందని ఆయన తెలిపాడు. త్వరలోనే ఈ సొమ్ము అతని ఖాతాలోకి చేరనున్నాయి. ప్రస్తుతం ఓ షిప్పింగ్ కంపెనీలో కో-ఆర్డినేటర్‌గా పనిచేస్తున్న కృష్ణన్ కేరళలో తమకు సొంతిల్లు ఉందని, దానికి ఇప్పటికీ లోన్ చెల్లిస్తున్నట్లు తెలిపాడు.

అంతే కాదు లాటరీ తగిలిందని వెంటనే ఇండియా వచ్చేయనని, మరి కొద్దిరోజులు ఇక్కడే పనిచేస్తానని పేర్కొన్నాడు. కృష్ణన్ భార్య ఓ ప్రైవేట్ సంస్థలో అడ్మినిస్ట్రేటివ్ అసిస్టెంట్‌గా విధులు నిర్వహిస్తోంది. తమకు కలిసొచ్చిన ఈ దేశాన్ని అప్పుడే ఎందుకు విడిచిపెట్టాలని ఆ దంపతులు అంటున్నారు.