అరబ్బుల గడ్డ మీద మహా రుద్ర యాగం.. అద్భుత దృశ్యాలు!

మహాశివరాత్రి వేడుకలను భారత్‌తోపాటు ప్రపంచవ్యాప్తంగా ఉన్న హిందువులు భక్తిశ్రద్ధలతో జరుపుకున్నారు. విదేశాల్లో ఉన్న వారు సైతం తమకు దగ్గర్లోని శివాలయాలను సందర్శించి పూజలు నిర్వహించారు. దుబాయ్‌లోని భారతీయులు సైతం ఏటా శివరాత్రి పండుగను ఘనంగా నిర్వహిస్తారు. ఈ పర్వదినం రోజున దుబాయ్‌లోని శివాలయాన్ని వేలాది మంది హిందువులు దర్శించుకుంటారు.

ఈసారి శివరాత్రి సందర్భంగా దుబాయ్‌‌లో మహా రుద్ర మహా యజ్ఞాన్ని నిర్వహించారు. శివరాత్రి రోజు రాత్రి జాగారం చేయడం కోసం సంగీత కచేరీని సైతం నిర్వహించారు. అల్ సఫాలోని జేఎస్ఎస్ స్కూల్‌లో ఈ యజ్ఞాన్ని నిర్వహించారని కచేరీ ఇచ్చిన రాహుల్ వెల్లాల్ అనే 15 ఏళ్ల మ్యూజిషియన్ తెలిపారు. ఈ యజ్ఞానికి సంబంధించిన వీడియోను ఆయన ట్వీట్ చేశారు.
లక్షలాది మంది భారతీయులు ఉపాధి అవకాశాల కోసం గల్ఫ్ దేశాలకు వలస వెళ్తున్నారు. యూఏఈ లాంటి దేశాలు ఇస్లామిక్ దేశాలైనప్పటికీ.. పరమత సహనాన్ని ప్రదర్శిస్తూ.. హిందూ ఆలయాలను నిర్మించుకోవడానికి, పూజలు చేసుకోవడానికి అనుమతిస్తున్నాయి. దీంతో పండుగల సమయంలో పెద్ద సంఖ్యలో భారతీయులు అక్కడి దేవాలయాలకు పోటెత్తుతున్నారు.