శ్రీనివాస్ హత్యకు ట్రంప్ పాలసీలతో నో లింక్

అమెరికా నూతన అధ్యక్షుడు వలసలపై తీసుకుంటున్న విధానాలే తెలుగుయువకుడు, ఇంజనీర్ శ్రీనివాస్ కూచిభొట్ల హత్యకు కారణమని వస్తున్న విమర్శలను శ్వేతసౌధం (వైట్ హౌజ్) ఖండించింది.

బుధవారం కేన్సస్ పట్టణంలోని ఓ బార్ లో అడమ్ ప్యూరింటన్ అనే అమెరికా శ్వేత జాతీయుడు ‘మా దేశం విడిచివెళ్లండి’ అంటూ తెలుగు యువకులు శ్రీనివాస్, అలోక్ లపై కాల్పులు జరిపాడు. ఈ కాల్పుల్లో శ్రీనివాస్ మరణించగా, అలోక్ గాయపడ్డాడు. వీరిని రక్షించేందుకు ఓ అమెరికన్ కూడా గాయపడ్డ సంగతి తెలిసిందే.

దీంతో అధ్యక్షుడు డొనాల్డ్ ట్రంప్ విధానాలపై పెద్ద ఎత్తున విమర్శలు వెల్లువెత్తాయి. వలసదారులపై ట్రంప్ తీసుకుంటున్న నిర్ణయాల కారణంగానే శ్వేతజాతీయులు రెచ్చిపోతున్నారని, ఫలితంగా హత్యలు జరుగుతున్నాయని ఆరోపణలు వస్తున్నాయి. అయితే ఈ విమర్శలను శ్వేత సౌధం ఖండించింది.

‘‘ఎవరి ప్రాణాలు పోయినా అది పూడ్చుకోలేనిది. కానీ ట్రంప్ వలసలపై తీసుకుంటున్న విధానాల వల్లే ఈ హత్యలు జరుగుతున్నాయని లింకు చేసి మాట్లాడటం సరైంది కాదు. ఇది పూర్తిగా అసంబద్ధం’’ అని వైట్ హౌజ్ అధికార ప్రతినిధి సియన్ స్పైసర్ అన్నారు.

శ్రీనివాస్ హత్య వెనుక అసలైన కారణాలు కనుక్కోవాల్సి ఉందని చెప్పిన స్పైసర్..అప్పుడే ఓ అంచనాకు రావడం కరెక్టు కాదని అన్నారు.

కాగా, శ్రీనివాస్ హత్యపై సమగ్ర విచారణ జరపాలని భారత రాయబార కార్యాలయం అమెరికా ప్రభుత్వంపై ఒత్తిడి పెంచింది.