మార్చి 18న భూమికి సౌర తుఫాన్‌ గండం!

భూమికి అయస్కాంత తుఫాన్ లేదా సౌర తుఫాన్ (మాగ్నటిక్ స్ట్రోమ్ లేదా సోలార్ స్ట్రోమ్) ప్రమాదం పొంచివుందని శాస్త్రవేత్తలు హెచ్చరిస్తున్నారు. దాదాపు 159 ఏళ్ల తర్వాత ఏర్పడుతున్న ఈ తుఫాన్ వల్ల టెలీకమ్యునికేషన్ వ్యవస్థ దెబ్బతినడమే కాకుండా, మనుషుల రక్త ప్రసరణపై కూడా దుష్ప్రభావం పడుతుందని తెలుపుతున్నారు. ఈ ముప్పు మరెప్పుడో కాదు, మార్చి 18నే ఏర్పడుతుందని రష్యన్ అకాడమి ఆఫ్ సైనెస్స్ పరిశోధకులు తెలిపారు.

సూర్యుడి నుంచి వెలువడే సౌర గాలుల(సోలార్ విండ్) వల్ల భూమికి ఉండే అయస్కాంతావరణానికి విఘాతం ఏర్పడుతుంది. దీన్నే మాగ్నటిక్ స్ట్రోమ్స్ లేదా జియో మాగ్నటిక్ స్ట్రోమ్స్ లేదా సోలర్ స్ట్రోమ్స్‌ అని అంటారు. సూర్యుడి కరొనా నుంచి వెలువడే కణాలు భూమిపై ఉండే అయస్కాంతావరణంలోని పరమాణువులు, అణువులపై ప్రభావం చూపడం వల్ల ఆ శక్తితో పనిచేసే వ్యవస్థలు చెల్లాచెదరయ్యే అవకాశాలున్నట్లు అంచనా వేస్తున్నారు.

ఈ శక్తి వల్ల టెలికమ్యునికేషన్ వ్యవస్థ మాత్రమే కాకుండా, విద్యుత్తు వ్యవస్థకు కూడా నష్టం వాటిల్లే ప్రమాదం ఉందని పరిశోధకులు భావిస్తున్నారు. ఈ నేపథ్యంలో నిత్యవసర అవసరాలకు మినహాయించి, మిగిలిన ప్రాంతాల్లో విద్యుత్తు సరఫరాను తాత్కాలికంగా నిలిపివేయాలని సూచిస్తున్నారు.

దీనిపై ఐరోపాకు చెందిన జాయింట్ రీసెర్చ్ సెంటర్ (JRC) స్పందిస్తూ.. శక్తవంతమైన సౌర తుఫాను కంట్రోల్ వ్యవస్థలపై ప్రభావం చూపుతాయని పేర్కొంది. దీనివల్ల రైల్వే వ్యవస్థకు కూడా విఘాతం ఏర్పడే ప్రమాదం ఉందని తెలిపింది.

మానవ శరీరంపై ప్రభావం? :
అయస్కాంత తుఫాన్ కేవలం టెలికమ్యునికేషన్, విద్యుత్ వ్యవస్థలపైనే కాదు.. మనుషులకు కూడా ప్రమాదకరమేనని హెచ్చరిస్తున్నారు. కొంతమందిలో రక్త ప్రవాహంలో మార్పులు కలుగుతాయి. అలాగే, రక్తపోటు, అడ్రినాలిన్ వంటి సమస్యలు ఏర్పడవచ్చని ‘స్పేస్‌డైలీ’ కథనం వెల్లడించింది.

1859లో...:
పరిశోధకులు చెబుతున్న ఈ విషయాన్ని అంత తేలికగా కొట్టే పారేయలేము. ఎందుకంటే.. 1859లో ఏర్పడిన అతి పెద్ద అయస్కాంత తుఫాన్ వల్ల ప్రపంచంలోని అన్ని టెలీగ్రాఫ్ స్టేషన్లు దెబ్బతిన్నాయి. కొన్ని కమ్యునికేషన్ వస్తువుల నుంచి మెరుపులు (స్పార్క్స్) కూడా వచ్చాయి. ఈ సందర్భంగా ఆకాశంలో రంగు రంగుల ‘అరోరాలు’ ఏర్పడినట్లు ‘డెన్ఫోగీక్’ కథనం వెల్లడించింది. ఏది ఏమైనా, మన జాగ్రత్తలో మనం ఉండటం మంచిది.