గూగుల్ బంపర్ ఆఫర్.. ఆ విద్యార్థి జీతం రూ.1.2 కోట్లు!

ఇనిస్టిట్యూట్ ఆఫ్ ఇన్ఫర్మేషన్ టెక్నాలజీ - బెంగళూరు(IIIT-B)‌కు చెందిన 22 ఏళ్ల విద్యార్థిని అదిరిపోయే ఆఫర్ వరించింది. ఇంటర్నెట్ దిగ్గజం ‘గూగుల్’లో జాబ్ కొట్టేసిన ఆ విద్యార్థికి ఏటా రూ.1.2 కోట్లు ప్యాకేజీ లభించనుంది. అయితే, ఈ ఉద్యోగం అతన్ని అంత సులభంగా వరించలేదు. గూగుల్‌లో జాబ్ పొందేందుకు అతను ఎంతో కష్టపడ్డాడు.

ముంబయికి చెందిన ఆదిత్య పాలివాల్.. ఇంటిగ్రేటెడ్ ఎంటెక్ పూర్తి చేశాడు. కంప్యూటర్ లాంగ్వేజ్ కోడింగ్‌లో నైపుణ్యాన్ని పరీక్షించే అత్యంత ప్రతిష్టాత్మకమైన ఏసీఎం ఇంటర్నేషన్ కాలేజియేట్ ప్రోగ్రామింగ్ కంటెస్ట్ (ఐసీపీసీ) 2017-18లో ఆదిత్య ఫైనలిస్ట్‌గా నిలిచాడు. ఈ ఏడాది ప్రపంచంలోని 111 దేశాల్లోని 3,098 విశ్వవిద్యాలయాల నుంచి 50,000 మంది విద్యార్థులు పాల్గొన్న ఈ పోటీలో.. ఆదిత్య ఫైనలిస్టుగా నిలవడమనేది గర్వించదగిన విషయం.

గూగుల్ ఇటీవల ఆర్టిఫిషియల్ ఇంటెలిజెన్స్ టెక్నాలజీ పరిశోధనల కోసం ప్రపంచవ్యాప్తంగా 6000 మంది అభ్యర్థులను పరీక్షించి 50 మందిని ఎంపిక చేసింది. ఇందులో ఆదిత్య కూడా ఒకరు. ఆదిత్యకు న్యూయార్క్‌లోని గూగుల్ ఆర్టిఫిషియల్ ఇంటెలిజెన్స్ రీసెర్చ్‌ టీమ్‌‌కు ఎంపిక చేశారు. జులై 16 నుంచి ఇక్కడ విధుల్లో చేరనున్నాడు. ఈ సందర్భంగా ఆదిత్య ‘సమయం తెలుగు’తో మాట్లాడుతూ.. ‘‘నాకు ఈ ఆఫర్ మార్చిలో వచ్చింది. గూగుల్‌లో చేరడం ద్వారా మరిన్ని విషయాలను తెలుసుకుంటానని ఆశిస్తున్నాను’’ అని తెలిపాడు.
Read this article in English