లోకేషన్ ట్రాకింగ్.. గూగుల్‌పై కేసు!

లొకేషన్ ట్రాకింగ్ వ్యవస్థతో.. గూగుల్ సంస్థ స్మార్ట్‌ఫోన్ వినియోగదారుల ప్రైవసీకి భంగం కలిగిస్తోందంటూ కాలిఫోర్నియాకు చెందిన ఓ వ్యక్తి కోర్టును ఆశ్రయించాడు. లొకేషన్ హిస్టరీని ఆపినా సరే గూగుల్ తమ ఫోన్లను ట్రాక్ చేస్తోందంటూ ఫెడరల్ కోర్టుకు ఫిర్యాదు చేశాడు. తమ కదలికలను అక్రమంగా నిఘా ఉంచుతుందని ఆరోపించాడు.

ఇప్పుడు చాలా ఫోన్లు గూగుల్ ఫీచర్స్‌, యాప్స్‌తో అనుసంధానమై వస్తున్న సంగతి తెలిసిందే. గూగుల్ మ్యాప్స్ చూడాలన్నా, ఏదైనా చిరునామాను సెర్చ్ చేయాలన్నా.. ‘గూగుల్ లొకేషన్’ ఆన్ చేయాల్సి ఉంటుంది. ఆ తర్వాత మనం ఎక్కడికి వెళ్లినా.. ఆ ప్రాంతం సమాచారం మొత్తం గూగుల్ రహస్యంగా స్వీకరిస్తోందని ఫిర్యాదుదారులు తెలుపుతున్నారు. ఇలా చేయడం ప్రైవసీకి భంగం కలిగించడమేనని ఆరోపిస్తున్నారు. లొకేషన్ హిస్టరీని ఆపివుంచినా.. తాము తిరుగుతున్న ప్రాంతాల వివరాలను గూగుల్ రహస్యంగా సేకరిస్తోందనేది ఫిర్యాదుదారుడి వాదన. అయితే, గూగుల్ ఈ కేసుపై ఇంకా స్పందించలేదు.