PSLV C42 : ఇస్రో ప్రయోగం విజయవంతం

భారత అంతరిక్ష పరిశోధన సంస్థ ఇస్రో వాణిజ్యపరమైన రెండు ఉపగ్రహాలతో నింగిలోకి దూసుకెళ్లింది. నెల్లూరు జిల్లాలోని శ్రీహరికోట సతీష్ ధావన్‌ స్పేస్‌ సెంటర్‌ షార్‌ నుంచి ఆదివారం రాత్రి 10.08 గంటలకు పోలార్‌ శాటిలైట్‌ లాంచ్‌ వెహికల్‌-సి42ని లాంచ్ చేశారు. దీనిద్వారా బ్రిటన్‌కు చెందిన నోవాసర్‌, ఎస్‌1-4 ఉపగ్రహాలను కక్ష్యలోకి వదిలింది.

పీఎస్ఎల్వీ-సి42 పూర్తిగా వాణిజ్యపరమైన ప్రయోగం. దాదాపు 889 కిలోల బరువున్న ఈ ఉపగ్రహాలను సర్రె శాటిలైట్ టెక్నాలజీస్ లిమిటెడ్ రూపొందించింది. ఇస్రో వాణిజ్య విభాగాం యాంత్రిక్స్ కార్పొరేషన్ ఈ రెండు ఉపగ్రహాల ప్రయోగానికి ఏర్పాట్లు చేసింది. ప్రయోగం కౌంట్‌డౌన్ శనివారం మధ్యాహ్నం 1.08 గంటలకు ప్రారంభమైంది.

కక్ష్యలోకి ప్రవేశపెట్టిన రెండు ఉపగ్రహాలను భూపరిశీలనకు ఉపయోగిస్తారు. పీఎస్‌ఎల్వీ- సి42 రాకెట్ ద్వారా నోవాసర్, ఎస్1-4 ఉపగ్రహాలను 583 కిలోమీటర్ల పరిధిలోని సూర్య సమస్థితి కక్ష్యలో ప్రవేశపెట్టారు. సింథటిక్ ఎపర్చర్ రాడార్ ఉపగ్రహమైన నొవాసర్‌ను అటవీ, భూ, శీతల ప్రదేశాల పరిశీలన, వరదలు, విపత్తుల అంచనాలకు ఉపయోగపడేలా రూపొందించారు. వనరుల అధ్యయనం- వినియోగం, పరిసరాల పరిశీలన, పట్టణ నిర్వహణ సంబంధిత అంశాలను పరిశీలించేందుకు ఎస్1-4 ఉపగ్రహం నిర్మాణం సాగింది.

సాధారణంగా ఉపగ్రహ ప్రయోగాలు పగటిపూట నిర్వహిస్తారు. అయితే వాటికి భిన్నంగా ప్రస్తుత ప్రయోగం రాత్రిపూట నిర్వహించడం విశేషం. దీని పనితీరు, ఇమేజింగ్ అవసరాలు, ప్రకాశ తీవ్రతను దృష్టిలో పెట్టుకుని రాత్రిపూట ప్రయోగించామని తెలిపారు. ఇది ఓ రిమోట్ సెన్సింగ్ ఉపగ్రహం.. అందుకే భూమధ్యరేఖను దాటినప్పుడు అది ఒక నిర్దిష్ట ప్రకాశం కలిగి ఉండాలి... కాబట్టి రాత్రి సమయంలో దీన్ని ఖచ్చితంగా అంచనా వేయగలమని తెలియజేశారు. ప్రయోగం విజయవంతం కావడంతో ప్రధాని నరేంద్ర మోదీ ఇస్రో అంతరిక్ష శాస్త్రవేత్తలకు అభినందనలు తెలిపారు.