పీఎస్ఎల్వీ-సీ37 తీసిన సెల్ఫీ వీడియో!

భారత అంతరిక్ష పరిశోధన సంస్థ (ఇస్రో) నిన్న ఉద‌యం ఒకే రాకెట్‌తో 104 ఉపగ్రహాలను ప్రయోగించి మ‌న దేశ ఖ్యాతిని ఇనుమ‌డింప‌జేసిన సంగతి తెలిసిందే. ఈ ప్ర‌త్యేక ఘ‌ట్టాన్ని మ‌రింత మ‌ధురం చేయ‌డానికి ఇస్రో ముందుగానే ఒక ఏర్పాటు చేసింది. ఉపగ్రహాలను మోసుకుపోయిన పీఎస్‌ఎల్‌వీ-సీ37 వాహక నౌకకు హై రిజల్యూషన్‌ కెమెరాను అమర్చారు. ఈ కెమెరా నుంచి సెల్ఫీ వీడియో అందేలా శాస్త్రవేత్తలు ప్ర‌త్యేక‌ ఏర్పాటు చేశారు. ఈ వీడియోను ఇస్రో ఇవాళ విడుద‌ల చేసింది.

రాకెట్‌ లాంచ్‌ ప్రారంభం నుంచే కెమెరా త‌న ప‌ని ఆరంభించింది. అది అద్భుతమైన సెల్ఫీ వీడియోను చిత్రీకరించి, మ‌న‌కు అందించింది. లాంచ్‌ ప్రారంభమైన 18 నిమిషాల్లోనే మ‌న దేశానికి చెందిన మూడు ఉపగ్రహాలు కక్ష్యలోకి చేరాయి. ఆ తర్వాత వ‌ర‌స‌గా మిగతా 101 ఉపగ్రహాలు కక్ష్యలోకి చేరాయి. ఉపగ్రహాలు రాకెట్ నుంచి విడిపోయిన దృశ్యాలు వీడియోలో స్ప‌ష్టంగా క‌నిపిస్తున్నాయి. వీటితో పాటు నీలం, తెలుపు రంగుల్లో భూమి కూడా కనిపిస్తుంది.