ISRO మరో విజయం.. ఒకేసారి 9 ఉపగ్రహాలు అంతరిక్షంలోకి, ప్రయోజనాలివే

భారత అంతరిక్ష పరిశోధన సంస్థ (ISRO) మరో ఘనత సాధించింది. ఒకేసారి 9 ఉపగ్రహాలను అంతరిక్షంలోకి పంపించింది. తిరుపతి జిల్లా శ్రీహరికోటలోని సతీష్ ధావన్ అంతరిక్ష ప్రయోగ కేంద్రం నుంచి శనివారం (నవంబర్ 26) ఉదయం పోలార్ శాటిలైట్ లాంచింగ్ వెహికల్ (PSLV)-సీ54 రాకెట్ నిప్పులు చిందుతూ నింగిలోకి దూసుకెళ్లింది. ఆ తర్వాత కాసేపటికే ఈ ప్రయోగం విజయవంతమైనట్లు ఇస్రో శాస్త్రవేత్తలు ప్రకటించారు. ఓషన్‌‌శాట్‌, ఈవోఎస్‌ శాట్‌-6 సహా 8 నానో ఉపగ్రహాలను పీఎస్‌ఎల్‌వీ సీ-54 నిర్దేశిత కక్ష్యలోకి మోసుకెళ్లింది. ప్రయోగం విజయవంతం కావడంతో శాస్త్రవేత్తలు హర్షం ప్రకటించారు.

ప్రధానాంశాలు:
✦ పీఎస్ఎల్‌వీ-సీ54 వాహకనౌక ఎత్తు 44.4 మీటర్లు.

✦ పీఎస్‌ఎల్‌వీ సీ-54 ప్రధాన పేలోడ్ ‘ఓషన్‌శాట్’. దీన్నే ఎర్త్ అబ్జర్వేషన్ శాటిలైట్-6 అని పేర్కొంటారు. దీన్ని కక్ష్యలోకి ప్రవేశపెట్టే ప్రధాన ఉద్దేశంతో ఇస్రో ఈ ప్రయోగాన్ని చేపట్టింది.

✦ ఓషన్‌‌శాట్‌ ఉపగ్రహాల ద్వారా భూవాతావరణాన్ని పరిశీలిస్తున్నారు. తుఫానులను పసిగట్టడం, వాతావరణంలో తేమను అంచనా వేయడం, సముద్రాల మీద వాతావరణంపై ఈ శాటిలైట్ ద్వారా అధ్యయనం చేస్తున్నారు.


✦ ఇస్రో ఇంతకుముందు ప్రయోగించిన ఓషన్‌శాట్-2‌తో తాజాగా పంపించిన ఈఓఎస్-3 అనుసంధానం అవుతుంది. ఇప్పుడు కొనసాగుతున్న అధ్యయనాలకు ఎలాంటి ఆటంకాలు లేకుండా, సముద్రాలపై మరింత లోతుగా అధ్యయనం చేసేందుకు సైంటిస్టులకు ఈ శాటిలైట్ దోహదపడుతుంది.

✦ భూగర్భంలో చమురు నిల్వలు, మీథేన్ లీకులు, పంటలకొచ్చే తెగుళ్లను గుర్తించేందుకు ‘హైపర్‌స్పెక్ట్రల్‌ ఇమేజింగ్‌ ఉపగ్రహం’ ఉపయోగపడుతుంది.

✦ 9 ఉపగ్రహాల్లో ఒక్క ఓషన్‌శాట్ శాటిలైట్ బరువే 1,117 కేజీలు. దీంతో పాటు ఇతర నానో ఉపగ్రహాలన్నీ కలిపి మొత్తం బరువు 321 టన్నులు.

✦ పీఎస్ఎల్వీ-ఎక్స్‌ఎల్ వెర్షన్‌లో ఇది 24వ ప్రయోగం.

✦ భూటాన్‌కు చెందిన భూటాన్‌శాట్, బెంగళూరుపిక్సెల్ కంపెనీకి చెందిన ఆనంద్, సియాటెల్‌ ప్రధాన కేంద్రంగా ప్రపంచవ్యాప్తంగా కార్యకలాపాలను నిర్వహిస్తోన్న ‘స్పేస్‌ఫ్లైట్‌’ సంస్థకు చెందిన 4 ఇతర ఉపగ్రహాలను ఇస్రో శాస్త్రవేత్తలు ఈ పీఎస్ఎల్‌వీ-సీ54 వాహకనౌక ద్వారా నింగిలోకి పంపించారు.