వాయుసేనకు త్వరలో అత్యాధునిక యుద్ధ హెలికాప్టర్

అత్యాధునిక స్వదేశీ సాంకేతిక ప‌రిఙ్ఞానం ఉపయోగించి, తొలిసారిగా తేలికపాటి యుద్ధ హెలికాప్టర్‌ను రక్షణ రంగానికి చెందిన హిందూస్థాన్ ఏరోనాటిక్స్ సంస్థ అభివృద్ధి చేసింది. ఈ హెలికాప్టర్ చేరికతో వాయుసేన మరింత బలోపేతం కానుంది. హెచ్ఏఎల్ రూపొందించిన 5.8 టన్నుల బరువుగల తేలికపాటి యుద్ధ హెలికాప్టర్, స్వీయ ఆటోమేటిక్ ఫ్లయిట్ నియంత్రణా వ్యవస్థ సాయంతో తొలిసారిగా గాల్లో చక్కర్లు కొట్టింది. ఇది దాదాపు 20 నిమిషాల పాటు ఆటోమేటిక్ విధానంలో విజయవంతంగా ఎగిరిందని హెచ్ఏఎల్ చైర్మన్ టి సువర్ణ రాజు తెలిపారు. హెచ్ఏఎల్ చీఫ్ టెస్ట్ పైలట్ వింగ్ మాజీ కమాండర్ ఉన్ని కే పిళ్లై, టెస్ట్ పైలట్ గ్రూప్ కెప్టెన్ రాజేష్ వర్మలు ఈ హెలికాప్టర్‌ ఆటోమేటిక్ వ్యవస్థ పనితీరును పరిశీలించారని, బెంగళూరులోని తూర్పు ప్రాంతంలో ఉన్న రక్షణ శాఖ ఎయిర్ పోర్టుపై నుంచి ఇది ఎగిరిందని ఆయన తెలిపారు.

వాయుసేనకు ఈ తరహా హెలికాప్టర్లను మొత్తం 15 అందించనున్నట్లు ఆయన తెలియజేశారు. సముద్ర మట్టానికి 5,400 మీటర్ల ఎత్తులో ఉండే సియాచిన్ లాంటి ప్రాంతాల్లోనూ ఇవి అత్యంత సమర్థవంతంగా పని చేస్తాయని అన్నారు. రాత్రి సమయాల్లోనూ నిర్దేశించిన సునాయాశంగా చేరుకునే వ్యవస్థ ఇందులో ఉందని వెల్లడించారు. ప్రతికూల వాతావరణంలోనూ టేకాఫ్, ల్యాండింగ్ తీసుకుంటుందని, ఇందులో ఇద్దరు పైలట్లు ప్రయాణిస్తూ, శత్రు స్థావరాలపై బాంబులను కురిపించి రావచ్చని హెచ్ఏఎల్ చైర్మన్ వెల్లడించారు. దాడులు చేసే వ్యవస్థను కూడా ఆటోమేటిక్ కంట్రోల్ సిస్టమ్ స్వయంగా నిర్వహించే వీలుందని తెలిపారు.

ఈ తరహా హెలికాప్టర్ల నిర్మాణం పై 2016 మార్చిలో చర్చలు ప్రారంభం కాగా, గత ఆగస్టులో కేంద్రం ఆమోదం తెలిపింది. కేంద్ర ప్రభుత్వ ఆమోదంతో హెచ్ఏఎల్ ఈ ప్రాజెక్టును ప్రారంభించింది. స్వదేశీ సాంకేతిక ప‌రిఙ్ఞానంతో రూపొందించిన కాక్‌పీట్ వ్యవస్థను హెచ్ఏఎల్ ఇప్పటికే హెలికాప్టర్‌లో అమర్చే పనిలో ఉంది. ఇంటిగ్రేటెడ్ ఆర్కిటెక్చర్ డిస్‌ప్లే సిస్టమ్ పేరుతో ఇండియన్ ప్రయివేట్ ఇండస్ట్రీస్ అండ్ డెవలప్‌మెంట్ ఫ్లైట్ టెస్టింగ్‌లో ఇది కొనసాగుతుంది.