అంగారకుడిపై తుఫాన్.. నాసాకు ఎదురుగాలి!

అంగారక గ్రహం పుట్టుపుర్వోత్తరాలు, అక్కడ జీవుల మనుగుడ తదితర అంశాలపై నాసా పరిశోధనలు చేస్తున్న సంగతి తెలిసిందే. ఈ సందర్భంగా అంగారకుడిపై ప్రవేశపెట్టిన ‘ఆపర్చునిటీ రోవర్’ ఇప్పటికే కొన్ని ఫొటోలను నాసాకు పంపింది. అయితే, ఆ గ్రహంపై ఏర్పడిన దూళి తుఫాన్ వల్ల ఆ రోవర్‌తో నాసాకు సంబంధాలు తెగిపోయాయి.

ఆపర్చునిటీ రోవర్ అంగారకుడిపై దిగిన తర్వాత మే 30న మోస్తారు దూళి తుఫాన్ ఏర్పడింది. అయితే, జూన్ 20న ఈ తుఫాన్ మరింత తీవ్రమైంది. దీంతో జులై 18 నుంచి రోవర్ స్పందించడం లేదని నాసా తెలిపింది. రోవర్ పూర్తిగా దూళిలో కప్పబడి ఉండొచ్చని, దీనివల్ల తగిన సూర్యరశ్మి లభించక.. అందులోని సోలార్ సిస్టమ్ నిలిచిపోయి ఉంటుందని భావిస్తున్నారు.

రోవర్‌కు అమర్చిన సోలార్ వ్యవస్థ ద్వారానే అందులోని బ్యాటరీలు ఛార్జ్ అవుతాయి. ఇది మళ్లీ అందుబాటులోకి రావాలంటే కొన్ని వారాలు లేదా నెలల సమయం పట్టవచ్చని నాసా భావిస్తోంది. అంగారకుడిపై పరిశోధనలు చేస్తున్న మార్స్ రికన్నొసెన్స్ ఆర్బిటర్ (ఎంఆర్వో), మార్స్ ఒడిస్సె, మావెన్ ద్వారా అక్కడి వాతావరణాన్ని పరిశీలించి, పరిశోధనలు కొనసాగిస్తామని నాసా పేర్కొంది.