ఎముకలే వారికి పనిముట్లు, ఫ్యాషన్!

ఎముకలను ఎవరైనా పనిముట్లుగా వాడతారా? అయితే.. ఒకప్పుడు ప్రాచీనలు వాటినే ఆయుధాలుగా వాడేవారని తాజా అధ్యయనం ఒకటి వెల్లడించింది. ఇప్పటివరకు జరిగిన పరిశోధనల్లో ప్రాచీన యుగానికి చెందిన మానవులు రాళ్లను, కర్రలను పనిముట్లు, ఆయుధాలుగా వాడేవారని తెలిసింది. తాజాగా చైనాలోని హెనన్‌లో జరిపిన తవ్వకాల్లో ఆర్కియాలజిస్టులు కొన్ని అరుదైన పనిముట్లు కనుగొన్నారు. అవన్నీ ఎముకలతో తయారు చేసినవని గుర్తించారు. సుమారు 1,15,000 ఏళ్ల కిందట వాటిని వినియోగించేవారని పరిశోధకులు తెలిపారు.

వీటిని ప్రాచీన ఆది మానవులు (నీన్దేర్తల్) లేదా మానవ జాతికి చెందినవా అనేది ఇంకా తెలియరాలేదు. అయితే, ఈ ఎముకుల పనిముట్లు చూస్తుంటే అప్పటివారికి సాంకేతిక అవగాహన ఉన్నట్లు తెలుస్తోందని మాంట్రియల్ విశ్వవిద్యాలయంలోని మానవ శాస్త్ర విభాగానికి చెందిన ప్రొఫెసర్ ల్యూక్ డొయాన్ తెలిపారు.

అప్పట్లో ఎముకులను ఆయుధాలు, పనిముట్లు గానే కాకుండా ఫ్యాషన్ కోసం కూడా వినియోగించేవారని తెలుస్తోందన్నారు. ముఖ్యంగా వారు వివిధ జంతువులకు చెందిన ఎముకులు, కొమ్ములను వివిధ అవసరాల కోసం వినియోగించేవారిని తెలిపారు. రాళ్లను పనిముట్లతో చెక్కేందుకు సమయం, శ్రమ పడుతుందనే ఉద్దేశంతో ఎముకల నిర్మాణంలో ఉండే అమరికలను తమకు అనుకూలమైన పనిముట్లుగా మలుచుకొని ఉంటారని పరిశోదకులు తెలుపుతున్నారు.