అంగారకుడిపై నీళ్లున్నాయ్.. ఇదిగో ఆధారం!

భూమిపైనే కాదండోయ్.. అంగారకుడిపై కూడా నీళ్లున్నాయట. ఈ విషయం చెప్పింది మరెవ్వరో కాదు.. అమెరికా జియాలాజికల్ సర్వే వారి అస్ట్రోజియోలజీ సైన్స్ సెంటర్. అంగారకుడిపై నీటి జాడలు ఉన్నాయనే సమాచారం కొత్తది కాదు. 2001లో పంపిన స్పేస్‌క్రాఫ్ట్ ఈ విషయం తెలియజేసింది. అయితే, ఇందుకు అవసరమైన ఆధారాల కోసం అప్పటి నుంచి అన్వేషిస్తూనే ఉన్నారు. కొత్తగా ప్రవేశపెట్టిన మార్స్ రికోనస్సేన్స్ ఆర్బిటర్‌ ద్వారా పరిశోధకులు మరింత లోతైన అన్వేషణ కొనసాగించారు.

ఈ సందర్భంగా వారికి బలమైన ఆధారాలు లభించాయి. అంగారకుడిపై దాదాపు 300 అడుగుల మందంతో గడ్డ కట్టిన మంచును కనుగొన్నారు. దీంతో పరిశోధకులు మరింత లోతుగా అధ్యయనం జరిపేందుకు సిద్ధమవుతున్నారు. దీనిపై అమెరికా జియోలాజికల్ సర్వే సభ్యుడు కొలిన్ దుండాస్ మాట్లాడుతూ.. ‘‘అంగారకుడిపై మంచు చాయలు కనిపించాయి. ఈ నేపథ్యంలో వాటిపై మరింత శోధించి, అంగారకుడికి పుట్టుపుర్వొత్తరాలను వెలికితీస్తాం. అక్కడి వాతవరణ పరిస్థితులు, నీటి జాడలు ఇతరాత్ర అంశాలను కనుగొంటాం’’ అని తెలిపారు. ఈ విషయాన్ని వాషింగ్‌టన్ పోస్ట్ గురువారం వెల్లడించింది.