అల్వాల్‌లో 13 ఏళ్ల బాలిక అదృశ్యం!

సికింద్రాబాద్‌లో ఎనిమిదో తరగతి విద్యార్థిని అదృశ్యం కలకలం రేపుతోంది. అల్వాల్‌లోని సెయింట్‌ జేవీఆర్ పాఠశాలలో చదువుతున్న సంగీత(13) అనే బాలిక మంగళవారం (జూన్ 5) ఇంటి నుంచి పాఠశాలకు వెళ్లింది. సాయంత్రమైనా ఇంటికి తిరిగిరాలేదు. దీంతో కంగారుపడిన బాలిక తల్లిదండ్రులు పాఠశాలతో పాటు స్నేహితుల ఇళ్లలో గాలించారు. అయినా.. జాడ దొరక్కపోవడంతో ఆల్వాల్‌ పోలీసులకు ఫిర్యాదు చేశారు.

కేసు నమోదుచేసుకున్న పోలీసులు విచారణ ప్రారంభించారు. విచారణలో భాగంగా పాఠశాలలోని సీసీ కెమెరా పుటేజీని పరిశీలించారు. సంగీత మంగళవారం ఉదయం పాఠశాల లోపలికి, బయటకు వెళ్లిన దృశ్యాలు అందులో రికార్డయ్యాయి. వాటి ఆధారంగా విద్యార్థిని పాఠశాలలో 20 నిమిషాలు మాత్రమే ఉన్నట్లు గుర్తించారు. సంగీతను ఎవరైనా అపహరించి ఉంటారన్న కోణంలో పోలీసులు దర్యాప్తు చేస్తున్నారు.